Այսօր Երևանում ներկայացվեց և քննարկվեց անչափահաս ամբաստանյալների գործերով դատավարությունների մշտադիտարկման արդյունքների վերաբերյալ զեկույցը:

Զեկույցն անդրադառնում է 45 գործի, որոնցում որպես ամբաստանյալներ ներգրավված են անչափահասները: Այն նաև վերլուծում է ՀՀ օրենսդրությունն ու պրակտիկան, ինչպես նաև տարբեր կազմակերպությունների համագործակցությունը՝ անչափահասների արդարադատության համակարգի կատարելագործման ճանապարհին ընկած բացերը բացահայտելու և առաջարկություններ ներկայացնելու համար:

Ծրագիրն իրականացրել է «Քաղաքացիական հասարակության ինստիտուտ» հասարակական կազմակերպությունը՝ ԵԱՀԿ երևանյան գրասենյակի աջակցությամբ:

ԵԱՀԿ երևանյան գրասենյակի Մարդու իրավունքների ծրագրի ղեկավար Վլադիմիր Չունտուլովը նշեց. «Իրավախախտ երեխաները կարիք ունեն պաշտպանվածություն և ոչ միայն կառավարության կողմից, այլև ողջ հասարակության: Կանխարգելմանը զուգահեռ պետք է լինի ազատազրկմանը այլընտրանք առաջարկող քաղաքականություն»:

Մասնակիցները նաև քննարկեցին «Անչափահասների գործերով արդարադատությունը Հայաստանում. օրենքի հետ կոնֆլիկտ ունեցած անչափահասների տեսակետների» վերաբերյալ հետազոտությունը, որն իրականացրել է «Առաջադեմ սոցիալական տեխնոլոգիաներ» ՀԿ-ն ԵԱՀԿ երևանյան գրասենյակի աջակցությամբ:

Հետազոտության նպատակն է նպաստել երեխաների մասնակցությանը և գնահատել անչափահասների արդարադատության համակարգը երեխաների տեսանկյունից: Այն ՄԱԿ-Ի մանկական հիմնադրամի (UNICEF) հովանավորությամբ իրականացված՝ «Հայաստանում անչափահասների գործերով արդարադատության ոլորտի բարեփոխման ձեռքբերումների գնահատման» վերաբերյալ հետազոտության մաս է:

«Քաղաքացիական հասարակության ինստիտուտ» ՀԿ-ի նախագահ Արման Դանիելյանը հավելեց. «Անչափահասների հանցավորությունը Հայաստանում բավականին ցածր է՝ համեմատած շատ այլ երկրների հետ: Այնուամենայնիվ դեռևս անհրաժեշտ է ունենալ անչափահասների արդարադատության համակարգ, որտեղ իրավախախտ երիտասարդների նկատմամբ այլ մոտեցում է կիրառվում: Անհրաժեշտ է ունենալ հատուկ դատավորներ, քննիչներ, մասնագետներ դատական վարույթների ​​ ընթացքում: Սա մի համակարգ է, որը երկար ժամանակ կիրառվում է այլ երկրներում և արդյունավետ է համարվել»:

Միջոցառմանը մասնակցեցին դատական ​​իշխանության, Գլխավոր դատախազության, Մարդու իրավունքների պաշտպանի գրասենյակի, քաղաքացիական հասարակության, լրատվամիջոցների ներկայացուցիչներ, փաստաբաններ:

Դիտարկումն իրականացվել է Հայաստանի երեք քաղաքում՝ Երևանում, Վանաձորում և Գյումրիում: Ծրագրի շրջանակներում գրասենյակը նաև աջակցել է թեժ գծի աշխատանքին, ​​որն անվճար իրավաբանական խորհրդատվություն էր տրամադրում քաղաքացիներին, այդ թվում՝ անչափահասներին և նրանց հարազատներին:

Զեկույցի Էլեկտրոնային տարբերակը տեղադրված է այստեղ: