Հայկ Դավթյան

Ինչպես յուրաքանչյուր տրանսֆերային պատուհանի, այնպես էլ վերջին` 2014թ. ամառային տրանսֆերային պատուհանի ընթացքում անգլիական Պրեմիեր Լիգայում հանդես եկող թիմերը գրեթե ամեն օր մեկը մյուսի հետեւից հայտնում էին նոր ֆուտբոլիստներ ձեռք բերելու մասին:

Անդրադառնանք Պրեմիեր Լիգայում հանդես եկող ուժեղագույն թիմերի կարեւորագույն տրանսֆերներին:

«Մանչեսթեր Յունայթեդ»

Ձախողված մրցաշրջանից հետո ոչ մի երկրպագուի մոտ կասկած չկար, որ «մանկունյանցիներն» ամռան ընթացքում կհայտարարեն մի քանի աստղային ֆուտբոլիստների` իրենց թիմը համալրելու մասին: Ինչպես բոլորս տեսանք` «Յունայթեդը» տրանսֆերային պատուհանի փակման նույնիսկ վերջին ժամերին աստղային ձեռքբերում ունեցավ: Խոսքը գնում է ֆրանսիական Մոնակոյի արդեն նախկին հարձակվող Ռադամել Ֆալկաոյի մասին: Յունայթեդը վարձակալել է կոլումբիացուն, եւ ըստ պայմանավորվածության, ընթացիկ մրցաշրջանի ավարտից հետո կլորիկ գումարի դիմաց կարող է գնել Ֆալկաոյի ամբողջական տրանսֆերը:

Մադրիդի Ռեալի հետ երկար բանակցությունների արդյունքում մանչեսթերյան ակումբի շարքերը համալրեց եւս մեկ աշխարահռչակ ֆուտբոլիստ` Անխել Դի Մարիան, ում տեղափոխությունը «Յունայթեդի» համար արժեցավ մոտ 75 մլն եվրո: Դաշտի կենտրոնն ուժեղացնելու համար թիմը համալրեց Անդեր Հերեյրան, իսկ պաշտպանողական օղակն ուժեղացվեց աշխարհի վերջին առաջնությունում իրենց փայլուն դրսեւորած Մարկոս Ռոխոյի եւ Դեյլի Բլինդի ժամանումով: Բոլոր այս տեղափոխությունների համար թիմի ղեկավարները վճարեցին ավելի քան 193 մլն եվրո: Այսպիսով, Լուի Վան Գալն իր տրամադրության տակ  ունեցավ այն կազմը, որը ցանկանում էր տեսնել:

«Չելսի»

Գաղտնիք չէ, որ լոնդոնյան թիմն ամեն մրցաշրջանի մեկնարկից առաջ ուժեղացնում է մի քանի խաղային օղակներ: Այս անգամ  միակ լուրջ խնդիրը վերաբերում էր հարձակման գծին, որը հզորացնելու համար «Չելսին» գնեց Մադրիդի Ատլետիկոյում հոյակապ մրցաշրջան անցկացրած Դիեգո Կոստային, ում տեղափոխությունն արժեցավ 38 մլն եվրո: Անսպասելի կերպով Բարսելոնայից հեռացած Ֆրանսեսկ Ֆաբրեգասն էլ ավելի անսպասելի կերպով համալրեց լոնդոնցիների կազմը: Այս տրանսֆերն էլ իր հերթին արժեցավ 33 մլն եվրո:  «Չելսին» գնեց նաեւ Ատլետիկոյի մեկ այլ խաղացող` Ֆիլիպե Լուիսի եւ ֆրանսիացի հարձակվող Լոիկ Ռեմիի տրանսֆերային իրավունքները, որոնք ակումբի համար արժեցան ավելի քան 30 մլն: Վարձակալության ավարտից հետո թիմ վերադարձան Տիբո Կուրտուան եւ Կուրտ Զուման: Այս ամենով հանդերձ, կարեւոր ենք համարում նշել, որ Չելսին ի հաշիվ թիմից հեռացած Դավիդ Լուիզի, Ռոմելու Լուկակուի եւ Դեմբա Բայի կորցրեց ընդամենը 9 միլիոն եվրո:

«Մանչեսթեր Սիթի»

Այն բանից հետո, երբ 2008թ.-ին թիմի սեփականատեր դարձավ շեյխ Մանսուրը` յուրաքանչյուր տրասնֆերային պատուհանի ընթացքում թիմը շատ մեծ գումարներ է ծախսում էլ ավելի զորեղ դառնալու համար: Ֆուտբոլում նման քաղաքականությանը դեմ գնացող անձինք` ՖԻՖԱ-ի օգնությամբ այս անգամ կարողացան ստիպել «Սիթիի» ղեկավարությանը շատ ավելի քիչ գումար ծախսել, քան թիմն այդ անում էր նախորդ տարիներին: Գնված եւ վաճառված խաղացողների գումարային տարբերությունն այս անգամ կազմեց գրեթե 32 մլն եվրո: Այնուամենայնիվ, պետք է նշել, որ «քաղաքաբնակների» ղեկավարությունը մեկ 40 միլիոնանոց տեղափոխություն իրականացրեց: Խոսքը գնում է Պորտուի նախկին պաշտպան Էլյակիմ Մանգալայի տրանսֆերի մասին: «Սիթի» տեղափոխվեց նույն ակումբի մեկ այլ խաղացող` Ֆերնանդոն: Տրանսֆերն արժեցավ 15 մլն, իսկ ահա արգենտինացի բազմափորձ դարպասապահ Վիլի Կաբալյերոն մանչեսթերցիների կազմն համալրեց 8 մլն եվրո փոխհատուցման դիմաց:

«Արսենալ»

Վերջապես լոնդոնյան այս ակումբը մեծ գումար ներդրեց թիմի կազմն ուժեղացնելու համար: Նախորդ մրցաշրջանում իրեն լավագույնս դրսեւորած չիլիացի վինգեր Ալեքսիս Սանչեսի համար «Արսենալը» 42,5 մլն եվրո վճարեց «Բարսելոնային»: Բացի Ալեքսիսից ակումբի կազմն համալրեցին եւս 4 ֆուտբոլիստներ: Դենի Ուելբեքը` «Մանչեսթեր Յունայթեդից», Կոլյում Չեմբերսը` «Սաութհեմփթոնից», Մաթյո Դեբուշին` «Նյուքասլից» եւ «Դավիդ Օսպինան»` ֆրանսիական Նիցից: Ընդանուր առմամբ` Արսեն Վենգերի թիմը ծախսեց ավելի քան 100 մլն եվրո գումար:

«Լիվերպուլ»

Միայն Լուիս Սուարեսի վաճառքից Լիվերպուլ քաղաքի համանուն թիմը տրանսֆերների համար ստացավ 81 մլն եվրո գումար: Իհարկե, սա ողջ գումարը չէ, որը ծախսվեց թիմն ուժեղացնելու համար: Լիվերպուլի կազմը համալրեցին այնպիսի ֆուտբոլիստներ, ինչպիսիք են Մարիո Բալոտոլլին, Դեյան Լովրենը, Ալբերտո Մորենոն, Լազար Մարկովիչը, Ադամ Լալլանան եւ Էմրե Ջանը: Ակումբի ղեկավարությունը ողջ ամռան ընթացքում ծախսեց շուրջ 150 մլն եվրո գումար:

Այլ ակումբների թանկարժեք ձեռքբերումները ներկայացնենք ստորեւ:

Ռոմելու Լուկակու. «Չելսի»-«Էվերթոն»- 35,36 մլն եվրո

Սադիո Մանե. «Սալզբուրգ»-«Սաութհեմփթոն»-15 մլն եվրո

Էներ Վալենսիա. «Պաչուկա»-«Վեսթ Հեմ»-15 մլն եվրո

Շեյն Լոնգ. «Հալ Սիթի»-«Սաութհեմփթոն»-14.9 մլն եվրո

Դուսան Տադիչ. «Տվենտե»-«Սաութհեմփթոն»-14 մլն եվրո

Բեն Դեյվիս. «Սուոնսի Սիթի»-«Տոտնհեմ»-12.65 մլն եվրո

Ջեք Ռոդվել. «Մանչեսթեր Սիթի»-«Սանդերլենդ»-12.6 մլն եվրո

Ֆրայսեր Ֆորսթեր. «Սելթիկ»-«Սաութհեմփթոն»-12.5 մլն եվրո

Աբել Հերնանդես-«Պալերմո»-«Հալ Սիթի»-12 մլն եվրո

Սթիվեն Կոլկեր. «Քարդիֆ Սիթի»-«ՔՊՌ»-1,75 մլն եվրո

Լեոնարդո Ուլոա. «Բրայթոն»-«Լեյսթեր Սիթի»-10,12 մլն եվրո

Բրաուն Իդեյե. «Դինամո Կիեւ»-«Վեսթ Բրոմվիչ»-10 մլն եվրո

Լերոյ Ֆեր. «Նորվիչ Սիթի»-«ՔՊՌ»-10 մլն եվրո

Ռեմի Կաբելյա. «Մոնպելյե»-«Նյուքասլ»-10 մլն եվրո

Ֆեդերիկո Ֆերնանդես. «Նապոլի»-«Սուոնսի Սիթի»-10 մլն եվրո

Ֆեդերիկո ֆացիո. «Սեվիլյա»-«Տոտնհեմ»-10 մլն եվրո

Գրազիանո Պելե-«Տվենտե»-«Սաութհեմփթոն»-10 մլն եվրո

Հ.Գ. Տրասնֆերների արժեքների մասին տեղեկությունները վերցված են transfermarket.com կայքից: