Անցած շաբաթվա ընթացքում ղարաբաղաադրբեջանական հակամարտ զորքերի շփման գծում իրադրությունը տակավին անհանգիստ էր: Չնայած պաշտոնական Բաքվի կողմից միջազգային տարբեր ատյաններում պարբերաբար հնչեցվող այն մեղադրանքներին, թե իբր հայկական կողմը շարունակ խախտում է հրադադարի պահպանման ռեժիմը, իրականությունը փաստում է լրիվ հակառակը:

Դրա վառ ապացույցն են անցած 7 օրվա ընթացքում ադրբեջանական բանակի առաջապահ ստորաբաժանումների ձեռնարկած նախահարձակ գործողությունները, որոնց արդյունքում տարբեր տրամաչափի հրաձգային զենքերից թշնամին հրադադարի ռեժիմը խախտել է շուրջ 180 անգամ' հայկական դիրքերի ուղղությամբ արձակելով ավելի քան 550 կրակոց:

Համաձայն Պաշտպանության բանակի օպերատիվ տվյալների՝ առավել ինտենսիվ խախտումներ են արձանագրվել հոկտեմբերի 4-ին և 5-ին, որոնց ընթացքում, բացի ինքնաձիգերից և գնդացիրներից, հակառակորդը շուրջ 70 անգամ թիրախային կրակ է բացել «СВД», «Սև նետ» և «Իստիգլալ» դիպուկահարային զինատեսակներից:

Մանավորապես հոկտեմբերի 5-ին, շփման գծի արևելյան ուղղությամբ տեղակայված զորամասերից մեկի պահպանության տեղամասի մարտական դիրքի ուղղությամբ թշնամու արձակած կրակոցից ստանալով գնդակային հրազենային վիրավորում, զոհվել է Պաշտպանության բանակի զինծառայող, 1987թ. ծնված Յուրի Արամի Սարգսյանը:

Կատարվածը մեկ անգամ ևս փաստում է, որ ինչպես դարանակալ թշնամու զինուժը, այնպես էլ նրա սադրիչ գործողությունները պարտակող քարոզիչները նպատակային քայլեր են իրականացնում հակամարտ կողմերի շփման գծում իրադրությունն ապակայունացնելու ուղղությամբ: Հանգամանք, որը ՊԲ դիրքապահ ստորաբաժանումներին ստիպում է իրենց գործողություններում լինել առավել վճռական և թշնամուն տալ համարժեք, գուցե նաև խիստ պատասխան: