«Մենք պահանջում ենք կառավարությունից, որ նրանք ներկայացնեն ոչ թե արտահանմանն ուղղորդված, այլ ընդհանրապես արդյունաբերական քաղաքականության հայեցակարգ, որը կկանոնակարգի մեր տնտեսության հիմնական ճյուղի գործառույթները»,- այսօր լրագրողների հետ հանդիպաման ժամանակ ասաց Հայաստանի հայրենական արտադրողների միության նախագահ Վազգեն Սաֆարյանը:

Նա նշեց, որ ըստ կառավարության ներկայցրած 2012 թ.-ի բյուջեի`ՀՆԱ-ն աճելու է 4.2 %-ով՝ նախկին տարվա 4.6-%-ի համեմատ: Եկամուտները լինելու են 910 մլրդ դրամ, որը 6.8%-ով ավելի է, քան անցած տարվա ցուցանիշը: Պետական բյուջեի հարկային եկամուտներն ու տուրքերը կլինեն 17.36%, ինչը Վ. Սաֆարյանը Հայաստանի համար համարում է բավականին ցածր ցուցանիշ, և «դա խոսում է ցածր հարկահավաքության մասին»: Իսկ այդ ցուցանիշը պետք է լինի առնվազն 23-25%: Նա հույս ունի, որ 2011թ.-ին արդյունաբերության ՀՆԱ-ի բաժինը կլինին 25%-ից ավելի, որը հաջորդ տարի ավելի կբարձրանա:

Վ. Սաֆարանյանը նշեց, որ իրենք կառավարության հետ երկխոսության մեջ են, որպեսզի այն փոխի երկրի տնտեսական քաղաքականությունը: Ըստ նրա` տնտեսության մեջ հիմնական բաղթողումը ներդրումների պակասն է: Արդյունքում տնտեսության մի զգալի մասը մնում է ստվերում, ինչը չի թաքցնում անգամ իշխանությունը:  

«Պետությունը պետք է որոշակի ապրանքնատեսակներ` ստրատեգիական նշանակություն ունեցող, ինքը ներմուծի, դրանով իսկ ձևավորի առևտրային կապիտալ և այն տեղաբաշխի արդյունբերության մեջ, տնտեսության այն ճյուղերում, որն ինքը համարում է ստրատեգիական»,- հավելեց Վ. Սաֆարյանը:

Վերջինս 2012 թ.-ի բյուջեն անվանեց «սոցիալական ուղղվածության բյուջե», որի արդյունքում թոշակները կբարձրանան 3 հազար դրամով, իսկ նպաստները` 2700 դրամով:  Սակայն, ըստ նրա, ավելի արդյունավետ կլիներ, եթե պետբյուջեն ունենար ներդրողական քաղաքականություն: Դա պետք է լինի տնտեսության զարգացման «տեսլականը և ռազմավարությունը»:

Հարկավոր է ներդրումներ անել հատկապես արդյունաբերության մեջ և զարգացնել տնտեսության այդ ճյուղը: Իսկ  պետությունը պետք է ավելի շատ մասնակցի տնտեսական գործառույթների իրականացմանը:

«Ազատ մրցակցությունը դեռ բավարար հիմքերի վրա չէ. կան օլիգարխիկ տնտեսություններ, մոնոպոլիաներ, որոնց դեմ ինչ-որ չափով պայքար մղվում է», - նշեց Վ. Սաֆարյանը:

Նրա խոսքերով` ինքը կողմ է հարկերի բարձրացմանը, սակայն տնտեսագիտորեն սխալ է հարկերի հաշվին աշխատավարձ բարձրացնելը: Իրականում դրանք պետք է բարձրանան պետության եկամուտների հաշվին:

«Այնպիսի հարկահավաքություն լինի, որը չկործանի մեր տնտեսությունը, այլ նպաստի այդ տնտեսության զարգացմանը: Շատ-շատ փոքր ու միջին ձեռնարկություններ հարկային ճնշմանը չեն դիմանում», - հավելեց Վ. Սաֆարյանը:

Պրոգրեսիվ հարկահավքությունը շատ զարգացած երկրներում կիրռավում է: Մեզանում էլ պետք է այդպիսի գործառույթ կիրառվի, որ չլինեն այնպիսի մարդիկ, որ միլիարդներ ունենան, հետո «այդ միլիարդներից փշրանքների հասնող բարեգործություն անեն և աստվածներ դառնան»: