Ընդդիմությունը միշտ ունենում է արդարացի պահանջներ, բայց դրանք  չպետք է ներկայացվեն ուլտիմատումի ձևով: Հարցերն ավելի շատ դրական լուծում կստանան, եթե գործընթացը երկխոսության ձևաչափով ընթանա: Այս կարծիքը հայտնեց Հանրապետական խմբակցության պատգամավոր Համլետ Հարությունյանը լրագրողների հետ հանդիպման ժամանակ` անդրադառնալով Լևոն Տեր-Պետրոսյանի ներկայացած 15 պահանջներին: Կոնգրեսի դիրքորոշումը կոշտացե՞լ է, թե՞ մեղմացել է այդ պահանջներով, «Ժառանգության» խմբակցության պատգամավոր Ստեփան Սաֆարյանի գնահատմամբ, եթե ՀԱԿ-ը ներկայացնում է 15 կետ, որից զգալի մասի բավարարման դեպքում պատրաստ են մտնել երկխոսության մեջ, կարող է քննարկվել իբրև մեղմացում: Մյուս կողմից` կա հրաժարականների պահանջի մի ամբողջ շարք, որի բավարարումը չի պատկերացնում նույնիսկ Ստեփան Սաֆարյանը և փակուղային իրավիճակի է նմանեցնում: «Ես, օրինակ, կուզեի, որ առաջին հերթին այդ երկխոսությունը տեղի ունենար ընդդիմության ներսում»,- նկատեց Հ. Հարությունյանը: Նա մամուլում կարդացել էր ՀԱԿ-ի ներկայացուցիչ Լևոն Զուրաբյանի հայտարարությունը, որտեղ Լ. Զուրաբյանը «Ժառանգությանը» համարել է «քաղաքական քաշ չունեցող կուսակցություն»: Ստեփան Սաֆարյանը չհերքեց ընդդիմության ներսում երկխոսության կարևորության փաստը` միևնույն ժամանակ նկատելով, որ նույնը կարելի է ասել իշխանական թևի մասին, այդպիսի գնահատականներ միշտ լսել են տարբեր դաշտերում, նույնպիսի քաշային կատեգորիաների տերմիններով հանրապետականներն են խոսել ԲՀԿ-ի և ՕԵԿ-ի հետ, և դա նորություն չէ. «Երկրի զարգացման, քաղաքական կյանքի առողջացման, մյուս հարակից խնդիրների լուծման թիվ մեկ խոչընդոտը հասարակություն-իշխանություն, ընդդիմություն-իշխանություն անջրպետն է»,- կարծում է Ստեփան Սաֆարյանը: «Եթե էգուց և մյուս օրը մի քաղաքական փաստաթուղթ ստորագրեն, չպետք է քաղաքական խանդի առիթ հանդիսանա, դա սովորական քաղաքական գործընթացներ են»,- ասաց Հ. Հարությունյանը` անդրադառնալով ՀՀԿ-ԲՀԿ հուշագրին: Մինչդեռ Ստեփան Սաֆարյանը նշեց, որ իրենց համար միևնույն է, թե Հանրապետական կուսակցությունն ում հետ է` ԲՀԿ-ի, ՕԵԿ-ի կամ մեկ ուրիշի, կամ թե ՀԱԿ-ն ում հետ է: «Ես պիտի ասեմ, որ նորմալ երևույթ չէ: Չեմ կարծում, որ հզոր կուսակցությանը հատուկ երևույթ է ընտրություններից երկու տարի առաջ առաջադրել թեկնածություն, եթե չասեմ, որ, իմ կարծիքով, դա նաև օրենքի խախտում է: Այսինքն` փաստացի թեկնածության առաջադրում է եղել»,- ասաց Ստեփան Սաֆարյանը և բանավեճն ավարտեց երկխոսությամբ: -Պրն Հարությունյան, Դուք նորմա՞լ եք համարում, որ Սերժ Սարգսյանը ստորագրություն է դնում և ասում է, որ ես ինձ առաջադրում և ինձ սատարում եմ: -Ստյոպա, դու շատ լավ գիտես, որ ես շատ լավ էլ հավանում եմ, ինչո՞ւ ես այդ հարցը տալիս: Քեզ դուր չի գալիս այդ բանը, ինձ շատ լավ էլ դուր է գալիս: Այո, քաղաքական ուժերը պետք է կանխատեսելի լինեն, և նախագահն այնքան ազնվագույն գործիչ է, որ հնարավորություն է տալիս, որ դու էլ քննադատես, բայց արարքը քաղաքական մտածելակերպի սահմանների մեջ տեղավորվում է: -Իմ կարծիքով սա առողջ քաղաքական պրոցեսի մասին չի խոսում: -Դե քո կարծիքը...հո դու համաշխարհային ջրհեղեի հեղինակը չես: -Կարծեք թե մենք այստեղ ենք, որպեսզի կարծիքներ ներկայացնենք: