Նկարիչ, արվեստաբան Հենրիկ Գարուկյանը փողոցային առևտրի դադարեցմանը կողմնակից է, բայց ասում է, որ այդ գործընթացը ցուցադրական կամ ձևական չպետք է լինի: «Չլինի այդ մի անգամը, որ ասեն` արինք, գալչկան դրին ու այլևս վերջացավ: Մեզ պետք է, որ դա անընդհատ լինի»,- կարծում է նկարիչը: Հենրիկ Գարուկյանը միևնույն ժամանակ նշում է, որ ամեն ինչ չափի մեջ է գեղեցիկ: Այսօր լրագրողների հետ հանդիպման ժամանակ նա շեշտեց, որ Փարիզում էլ փողոցային առևտուր կա, այսինքն` չպետք է այնպես լինի, որ բոլոր անկյուններից հանեն մարդկանց կամ սրճարանները վերացնեն, չէ որ բացօթյա բազմաթիվ սրճարաններում հաճելի է նստել: Հենրիկ Գարուկյանը նաև կարծում է, որ այդ ամենը չպետք է լինի ծառերի կամ երեխաների խաղահրապարակների հաշվին: «Ամեն ինչ կարելի է անել մարդավարի, որ սիրելով անենք, որ մեր քաղաքի համար անենք»,- ասում է նկարիչը: Ճարտարապետ Լևոն Իգիթյանն էլ հավելում է` դա մեկանգամյա միջոցառում չպետք է լինի: Ավելին, հիվանդին բուժելու համար երբեմն ցավ են պատճառում: «Ինձ թվում է, որ մի խնդիր կա. սկզբից այդ մինի շուկաները պետք է արվեր,- ասում է Լևոն Իգիթյանը,- միգուցե պիտի նա սկսվեր, հետո կամաց-կամաց սա վերանար»: Անդրադառնալով երևանցիների` քաղաքի նկատմամբ ունեցած վերաբերումնքին` Լևոն Իգիթյանը նշեց, որ այստեղ սիրո պակաս կա: «Երևանին պետք է նուրբ և խորը վերաբերվել, որովհետև եթե այսօր մի հին տուն, որը, գիտականորեն եթե դատենք, արժեք չունի, և պետք է մի նոր փողոց բացվի, իսկ այդ տունը խանգարում է, այդ փողոցը չի կարող չլինել, քաղաքին անհրաժեշտ է, բայց մի տեսակ կա, որ ցանկացած քայլի շուրջ վայնասուն է բարձրացնում»,- ասում է ճարտարապետը: Քաղաքում իրականացվող շինարարությունների թեման շոշափելով` Լևոն Իգիթյանը հիշեցնում է, որ մեծն Թամանյանի նախագծած հանրապետության հրապարակի կառուցման ժամանակ, որով պարծենում են բոլորը, նույնպես տներ են քանդվել: «Եթե մակերեսի տակը քանդեն, մտնեն, ապա կտեսնեն, որ տակը թաղեր կան, նկուղներ կան,- ասում է ճարտարապետը,- ավելի լավ է հրապարակն ունենանք, քան այդ տները տեղում մնային»: Լևոն Իգիթյանն անդրադարձավ նաև Հյուսիսային պողոտային և կրկին հիշեցրեց, որ կառուցումից առաջ «Թումանյանի փողոցում, մայթի վրա մայկայով, տան շորերով, չստերով նստած են եղել մարդիկ ու նարդի խաղացել: Հակահիգիենիկ վիճակ էր այդ թաղամասում, ոչ մարդուն, ոչ մայրաքաղաքի բնակչին վայել չէր այդ վիճակը»: Ճարտարապետը վստահեցնում է, որ Թամանյանն ինքն էլ էր նախատեսել այդ փողոցը: