Ջավախքցի այն ուսանողները, որոնք հաջորդ տարվանից պետպատվերով կըդունվեն պետական բուհեր, իրենց հիմնական դասերից զատ` պարտավոր կլինեն հաճախել Բրյուսովի անվան պետական լեզվաբանական համալսարանում բացված վրացագիտության կենտրոնի վրացերեն լեզվի դասաժամերին, ունենալ կրեդիտներ վրացերենից։ Վճարովի համակարգում սովորողների համար այս պայմանը պարտադիր չէ։ «Եթե մեր հայրենակիցը գալիս է Հայաստան և կրթաթոշակ է շահում և ստանում, ապա մենք իրեն պարտադրելու ենք վրացերենի իմացության չորս տարվա կուրսերը, և այդքանով կարող ենք մեր լուման ունենալ երիտասարդ, մեր նոր մասնագետների, կադրերի արտագաղթը կանխելու մեջ»,- պատասխանելով «Հետքի» հարցին` այսօր կայացած ասուլիսի ժամանակ ասաց ՀՀ կրթության և գիտության նախարար Արմեն Աշոտյանը։ «Փաստորեն Երևանում բացվեց վրացագիտական երկրորդ կենտրոնը, որտեղ պետք է վրացերեն սովորեն նաև ջավախքցի ուսանողները։ Ավելի նպատակահարմար չէ՞ր այդ ռեսուրսներն ուղղել դեպի Ջավախք և նմանատիպ հայ-վրացական համատեղ կենտրոն կամ բուհ բացել հենց տեղում, որպեսզի  ջավախքցի ուսանողները տեղում մնային, և այս քայլով չնպաստեիք նրանց արտագաղթին» հարցին` Արմեն Աշոտյանը պատասխանեց, որ իրենք տեղյակ են ԵՊՀ-ում գործող վրացագիտության կենտրոնի մասին, սական այդ կենտրոնը այլ նպատակներ է հետապնդում՝ գիտական հետազոտություններ է անում` զուգահեռաբար դասավանդելով նաև լեզու, բայց այդ կենտրոնի առաքելությունը գիտությունն է և  Հայաստան-Վրաստան պատմական ու մշակութային կապերի ուսումնասիրությունը: Ա. Աշոտյանի խոսքով` Բրյուսովի անվան լեզվաբանական համալսարանում բացված կենտրոնը լոկ լեզվի դասավանդման առաքելություն է ունենալու։ Աշոտյանը նաև հավելեց, որ Ջավախքում վրացերենի ուսուցանման համար ավելի շատ պայմաններ են ստեղծվում, հայերենին զուգահեռ ստեղծվում է հնարավորություն ուսումնասիրել նաև վրացերենը։ «Ցանկության դեպքում կարելի է ուսումնասիրել նաև Վրաստանում, և մենք այստեղ Ջավախքի ուսանողների համար դա ցանկության խնդիր չենք թողել»,- հավելեց Ա. Աշոտյանը։ Իսկ հայ-վրացական համալսարանի խնդրի հետ կապված նախարարն ասաց, որ հարցը քննարկել է նաև Ջավախքում, բայց ոչ մի հիմնավորում չի արդարացրել համալսարանի ստեղծման գաղափարի իրականացումը։ «Հակառակը` ամբողջ հիմնավորումները հետևյալն էր՝ ունենալ կրթության հնարավորություն Ջավախքում հայկական դիպլոմ ստանալու ցանկությամբ, վրացերենը կսովորեն, թե չէ այնտեղ՝ ես մեծ կասկածներ ունեմ»,- ասաց նախարարը և հավելեց, որ իրենք փորձում են վրացերենի ուսումնասիրման համար ստեղծել պայմաններ, Բրյուսովի անվան համալսարանի կրթական ծրագրերը հարստացնել ևս մեկ լեզվով և միաժամանակ Վրաստանի քաղաքացի հայերին տալ հնարավորություն՝ չկտրվել վրաց հասարակություն վերադառնալու հնարավորությունից: «Կվերադառնան, թե չէ՝ ոչ ոք չգիտի: Ցավոք սրտի, շատ հաճախ են դեպքերը, երբ վրացական անձնագրով մեր հայրենակիցները գալիս են Հայաստան, փոխում են անձնագիրը, հետո խոսում են Ջավախքի հայաթափման մասին»,- ավարտեց Արմեն Աշոտյանը։