Մոտ մեկ ամսից կմեկնարկի նոր ուսումնական տարին, սակայն Արագածոտնի մարզի մի շարք դպրոցներում աշակերտները դարձյալ ստիպված կլինեն դասերն անցկացնել ահ ու դողով: Մարզի 16 դպրոց գտնվում է վթարային վիճակում, իսկ այս տարի նշված ուսումնական հաստատություններում վերանորոգման աշխատանքներ նախատեսված չեն:

Կառավարությունը պատճառաբանել է, թե բյուջեի միջոցները սուղ են: Մարզպետարանի քաղաքաշինության վարչության պետ Աշոտ Դավայանը «Հետքին» ասաց, որ իրենք ամեն տարի առաջնային վերանորոգման կարիք ունեցող դպրոցների ցանկը ներկայացնում են տարածքային կառավարման նախարարություն եւ այնտեղ խնդրին քաջատեղյակ են: 4-րդ կարգի խիստ վթարային է Վարդենիս գյուղի դպրոցը: Այս դպրոցին «Հետքը» մի քանի անգամ անդրադարձել է: Հրապարակումից հետո տնօրինությանը խոստացել էին, որ Սոցներդրումների հիմնադրամի միջոցներով դպրոցն անպայման կվերանորոգվի, կամ կկառուցվի նոր դպրոց: Ինչպես դպրոցի աշխատակազմը, այնպես էլ երեխաներն ու նրանց ծնողները ոգեւորվել էին նոր դպրոց ունենալու հնարավորությամբ, սակայն ուրախությունը կարճ տեւեց` այս տարի նույնպես երեխաները կսովորեն իրենց կյանքի ու առողջության համար խիստ վտանգավոր պայմաններում, քանի որ դպրոցի համար այդպես էլ գումար չգտնվեց: Սեյսմոլոգների եզրակացություններով` առաջնահերթ վերանորոգման կարիք ունեն նաեւ Վարդենուտ, Շենավան, Ափնա, Գեղաձոր, Գեղադիր, Նոր Ամանոս համայնքների դպրոցները, որոնց հիմնական մասն ունի վթարայնության 3-րդ աստիճան: Վթարային են նաեւ մարզի Սասունիկ գյուղի դպրոցի մասնաշենքերից մեկը, Եղիպատրուշի, Ճարճակիսի, Մելիքգյուղի, Կայնաշիրի դպրոցները: Այս տարի շինաշխատանքներ են կատարվում միայն Աշտարակի թիվ 3 եւ Փարպի գյուղի դպրոցներում: Նշված 2 դպրոցներում էլ շինաշխատանքները մեկնարկել էին դեռեւս նախորդ տարվանից, նախատեսված է այս տարի վերանորոգման աշխատանքներն ավարտին հասցնել: Դժվարություններ են առաջացել Փարպիի դպրոցի վերանորոգման աշխատանքներում, քանի որ մրցույթում հաղթած «Էրեբունի շին» ՍՊԸ-ի ղեկավարն առողջական խնդիրների պատճառով հրաժարվել է շարունակել վերանորոգման աշխատանքները: Աշոտ Դավայանի ասելով` առաջիկայում նոր մրցույթ կհայտարարվի, եւ շինաշխատանքներն ավարտին կհասցվեն: