Սեպտեմբերի 19-ին Լոռու մարզի ընդհանուր իրավասության դատարանում  շարունակվեց  «Մեթըլ Փրինս» կորպորացիայի նախագահ, ԱՄՆ քաղաքացի Սերոբ Տեր -Պողոսյանի դատաքննությունը: Հիշեցնենք, որ ամբաստանյալ Սերոբ Տեր-Պողոսյանին, ով ձերբակալվել է այս տարվա  փետրվարին, մեղադրանք է  առաջադրվել ՀՀ քր.օրենսգրքի 139 հոդվածի 3-րդ մասով և 139 հոդվածի  2-րդ մասի 3-րդ կետով:   Երեկվա դատական նիստը սկսվեց ժամը 13:00-ին և ավարտվեց 20:15-ին: 

Որքան երկարատև էր դատական նիստի ընթացքը, նույնքան էլ կարճ էր դատաքննության ընթացքի մասին ՀՀ գլխավոր դատախազության ազգային անվտանգության մարմիններում  քննվող գործերով վարչության ավագ դատախազ, մեղադրող  Արամ Ամիրզադյանի  տեղեկատվությունը:  Դատախազը   դատական նիստի ավարտին հոգնած էր. «Հոգնածությունից հիմա կարող եմ սխալ բաներ ասել»,-զգուշանում էր նա:  

Փակ դատաքննության անցած ժամանակահատվածում   լրագրողների և հասարակության համար անհայտ է մնացել հասարակական մեծ հնչեղություն ստացած  դատաքննության ընթացքը:  Արամ Ամիրզադյանը ընթացքի մասին նորից տվեց հակիրճ պատասխան. «Տարվում է օբյեկտիվ դատաքննություն»,- ասաց նա: Մեղադրողը  հայտնեց, որ այսօր ցուցմունքներ են տվել երկու տուժողներ և մեկ վկա. «Նրանք  պնդել են նախաքննական  իրենց ցուցմունքները: Այո, պնդել են միանշանակ»,- ասաց դատախազը: Այսպիսով, դատարանն ավարտել է  բոլոր 10 տուժողների հարցաքննությունը:  

Սերոբ Տեր-Պողոսյանից մեծ թվով անչափահասների սեռական կախավածությունը Արամ Ամիրզադյանը կրկին բացատրեց  զուտ գումարային կախվածությամբ. «Ուրեմն, ըստ տուժողների ներկայացրածի, հիմնական պատճառը  գումարային  առումով է մեծ կախվածություն  անչափահասների մոտ  ձևավորել: Ես չեմ կարող մանրամասնություններ ասել.  ապացույցները երբ կվերլուծենք, այն ժամանակ ես Ձեր հարցերին կպատասխանեմ լիարժեք:  Հիմա, քանի որ ես Ձեզ ասացի երկու տուժող ենք հարցաքննել և մեկ վկա, նրանք էլ ցուցմունքները պնդել են, էդքանով  բավարարվեք: Բավարարվեք սրանով: Վերջ»,- ասաց Արամ Ամիրզադյանը: 

Տուժած զինծառայողների  զորամասերում  նրանց անվտանգության ապահովման և   զորամասերից տեղափոխման հետ կապված լրագրողների հարցին Արամ Ամիրզադյանը պատասխանեց. «Ոչ ոք տեղեկություն չունի, և դա գաղտնի է,  այդ մարդկանց չի կարելի այդքան ծանր վիճակի մեջ դնել ուղղակի: Ես չեմ կարծում, որ զորամասերում պետք է տեղյակ լինեն:  Ո՞վ պետք է հրապարակի նրանց  անունները: Դո՞ւք: Դռնփակ դատական նիստ է»,- լրագրողներին հարցրեց մեղադրողը:

Տուժողների հարցաքննությունը ավարտելուց հետո  մեղադրական եզրակացության վերջնական  հիմնավորման հետ կապված Արամ Ամիրզադյանն  ասաց. «Որ կհետազոտենք լրիվ, ես Ձեզ նորից ասում եմ, այն ժամանակ կասեմ` լրիվ ապացույցները համադրելով: Այսինքն,  այսօրվա դրությամբ չկա որևիցե բան, որ շեղված լինի մեր նախաքննության ընթացքում տրված ցուցմունքներից: Կան փոքր շեղումներ, որոշակի շեղումներ, բայց դրանք, ես կարծում եմ, էական շեղումներ չեն»,- ասաց  մեղադրողը:

Դատական նիստի ավարտին  Սերոբ Տեր -Պողոսյանի պաշտպաններ  Տիգրան Սաֆարյանից և Գիվի Հովհանիսյանից  տեղեկատվություն  ստանալ մեզ չհաջողվեց:  Նրանք ընտրել են լռելու մարտավարությունը: Հաջորդ դատական նիստը տեղի կունենա  սեպտեմբերի 26-ին` ժամը 12-ին: