Տեսանյութեր
Լուսանկարներ
Թե ովքեր են իրականում պախարակում բանակը
ԱԺ ՀՀԿ խմբակցության պատգամավոր Կարեն Ավագյանն այսօր հայտարարությունների ժամին ասաց, որ իր աղբյուրներից ճշտել է, որ բանակում վիճակն ավելի լավ է, քան ասենք` 2007-ին: Պատգամավորը դիմել է իր «աղբյուրների» օգնությանն այն բանից հետո, երբ վերջերս մի շարք կազմակերպություններ եւ անհատ քաղաքացիներ քննադատական խոսքերով են հանդես եկել բանակում կատարվող երեւույթների վերաբերյալ: Ըստ պատգամավորի` նորից մի խումբ մարդիկ պարապ են մնացել:
«Արդեն սկսում ես մտածել, որ սա ոչ թե պարապ մարդկանց հոխորտանք է, այլ նպատակաուղղված հարձակում ազգայինի դեմ: Բանակում զինվորին պետք է ապահովել սոցիալ-կենցաղային պայմաններով, սնունդով, սովորեցնել լավ կրակել, օգտվել իրեն ամրակցված զենքից, ֆիզիկապես կոփել եւ այլն: Թվարկվածներից եւ ոչ մեկի մասով դժգոհություն չկա, եւ ոչ ոք այդ մասին չի խոսում ու գրում: Ինչո՞ւ ոչ ոք չի խոսում, որ իր որդուն վատ են սովորեցրել կրակել ինքնաձիգից, կամ իր որդին բանակից վերադարձել է ֆիզիկապես շատ թույլ: Եթե չեն բողոքում, ուրեմն շատ լավ է, որովհետեւ պաշտպանության նախարարը հակամարտության մեջ գտնվող մեր երկրում առաջին հերթին պետք է աշխատի հենց այդ ուղղություններով, կարգապահության ուղղությամբ նույնպես,-ասաց Կարեն Ավագյանը եւ հավելեց,- Մի՞թե պաշտպանության նախարարը պետք է բացատրի մեր որդիներին, որ զավակս, 5 հոգով մեկին մահու չափ ծեծելը ստորություն է, ինչ էլ նա արած լինի»:
Կարեն Ավագյանը, ամփոփելով իր հայտարարությունը, ավելացրեց, որ պետք է նայել ճշմարտության աչքերին եւ այն մարդիկ, ովքեր պախարակում են հայոց բանակը, այդպիսով օտարում են «ժողովրդի քրտինքով ստեղծված բանակը հենց ժողովրդից»:
Մեկնաբանություններ (6)
Մեկնաբանել