Լրագրողների հետ հարց ու պատասխանի ժամանակ այսօր Աժ նախագահ Հովիկ Աբրահամյանը, անդրադառնալով լրագրողներից մեկի այն հարցին, թե «Ժառանգություն» խմբակցությունն այսօր վերադառնալով խորհրդարան հայտարարեց, թե անցած 6 ամիսների ընթացքում հանդիպումներից հետո եկել է այն եզրակացության, որ կա իշխանափոխության մասին հստակ պատկերացում եւ չեղյալ է հայտարարում կոալիցիոն հուշագիրը, պատասխանեց.

«Եթե որոշ քաղաքական ուժերի կողմից կոալիցիա է ձեւավորվում, որեւէ այլ քաղաքական ուժ, որը ներգրավված չէ այդ կոալիցիայի մեջ, ի՞նչ իրավունք ունի չեղյալ համարի: Նման բան լինել չի կարող, ուղղակի իրենց պետք էր իրենց բացակայության պատասխանը տալ, փորձել հանրությանը ներկայացնել, թե ինչու չեն մասնակցել օրենսդիրի աշխատանքներին: Ես բազմաթիվ նիստերի ժամանակ եւ առանձին հանդիպումների ժամանակ իրենց հորդորել եմ, որ մասնակցեն Ազգային ժողովի աշխատանքներին, եւ ես ուրախ եմ, որ իրենք այսօր մասնակցեցին այդ աշխատանքներին: Այլ որեւէ մոտեցում ես չեմ ուզում հայտնել»:

Հովիկ Աբրահամյանը նշեց, որ ինքը վարչապետ դառնալու ցանկություն չունի եւ եկել է այն եզրահանգման, որ բոլոր նրանք, ովքեր ուզում են վարչապետի աթոռը զբաղեցնել, իր անունն էլ կողքից գրում են: «Ես ինձ պատկերացնում եմ օրենսդիր մարմնում, որպես Ազգային ժողովի ղեկավար»,-ասաց Հ, Աբրահամյանը:

Անդրադառնալով հանրապետության նախագահի աշխատակազմի ղեկավար Կարեն Կարապետյանի հրաժարականին` Հովիկ Աբրահամյանը հայտարարեց, թե Կարեն Կարապետյանը նպատակահարմար գտավ իր ուժը, եռանդն ու գիտելիքներն օգտագործել այլ բնագավառում: «Ես, իհարկե, ցավով եմ ասում դա, որովհետեւ մենք շատ արդյունավետ, համատեղ, համերաշխ աշխատել ենք եւ որպես աշխատակազմի ղեկավար եւ որպես Հանրապետականի գործադիրի անդամ»,- հավելեց ԱԺ նախագահը: