Այսօր`ժամը 03:20-ի սահմաններում, 20-ամյա Վահրամ Խաչատուրովը, Մյասնիկյան պողոտայում վարելով «Մերսեդես Բենց Ե 230» մակնիշի 20 ՕՏ 929 համարանիշի ավտոմեքենան, «Բելաջիո» ռեստորանային համալիրի մոտ չհասած, չկարողանալով տեղավորվել շրջադարձի մեջ, դուրս է եկել դեպի ձախ և ընդհարվել ծառին:

Ընդհարվելուց հետո մի քանի պտույտ շրջվելով` ընթացել է և հայտնվել մայթին` բախվելով մեկ այլ ծառի:

Մինչ դեպքի վայր են ժամանել Ճանապարհային ոստիկանության աշխատակիցները, դեպքի վայր ժամանած ՀՀ արտակարգ իրավիճակների նախարարության Հայաստանի փրկարար ծառայության Երևանի փրկարարական վարչության փրկարարներն ու վթարի հարևանությամբ բնակվող` սեփական տների բնակիչներն ավտոմեքենայից դուրս են բերել վարորդին և ուղևոր, 20-ամյա Ռաֆայել Ալոյանին:

Վարորդն ու ուղևորը մարմնական ծանր վնասվածքներով տեղափոխվել են թիվ 1 համալսարանական հիվանդանոց:

Հիվանդանոցի վերակենդանացման բաժանմունքում Վ. Խաչատուրովը, գիտակցության չգալով, մահացել է:

Ինչպես հայտնում է ֆոտոլրագրող Գագիկ Շամշյանը, ավտոմեքենայի սրահում հայտնաբերվել է նարգիլե, իսկ հավաքվածները պատմել են, որ երբ վիրավորներին դուրս են բերել ավտոմեքենայից, վարորդը ձեռքում պինդ բռնած է եղել նարգիլեի փողրակը:

Հարվածն այնքան ուժգին է եղել, որ հաստաբուն ծառը արմատախիլ անելուց հետո ավտոմեքենայի վրայից պոկվել և մոտ հինգ մետր դուրս է թռել գազի բալոնը:

Ապահովագրական ընկերության ներկայացուցիչներ, ըստ ֆոտոլրագրողի, դեպքի վայր չեն եկել, իսկ երբ ահազանգով ժամանել են պաշտպանության նախարարության ու ռազմական ոստիկանության ներկայացուցիչները և հենց դեպքի վայրում իմացել, որ վթարի ենթարկվածները Էջմիածնի զորամասի ժամկետային զինծառայողներ են, ասել են, որ գործով պետք է իրենք զբաղվեն: Սակայն չգիտես ինչու 10 րոպե հետո նրանք հեռացել են դեպքի վայրից:

Հավաքված քաղաքացիների զրույցից պարզ է դարձել, որ ՊՆ և ՌՈ ներկայացուցիչները հեռախոսային խոսակցություններից հետո դեպքի վայրում ոչ մի քննչական գործողություն չկատարելով հեռացել են:

Լուսանկարները` Գագիկ Շամշյանի