Այս պահի դրությամբ ՀՀ արտակարգ իրավիճակների նախարարության փրկարարական ջոկատը մշտական տեղակայման վայրում բերված է պատրաստականության վիճակի ու պատրաստ է մեկնել աղետի գոտի` Հաիթի` իրականացնելու համապատասխան փրկարարական աշխատանքներ: Խումբը բաղկացած է 50 հոգուց:

Ջոկատի հրամանատար է նշանակվել Հատուկ փրկարարական ջոկատի հրամանատար, փոխգնդապետ Ավետիք Մանուկյանը, իսկ խմբի ղեկավար` Արտակարգ իրավիճակների նախարարության փրկարար ծառայության տնօրենի տեղակալ, գնդապետ Սերգեյ Ազարյանը: Այս մասին քիչ առաջ «Հետքին» հայտնեց նախարարության մամուլի խոսնակ Սուսաննա Աբրահամյանը, ով զանգահարել էր խմբագրություն: «Մենք ցանկացած պահի պատրաստ ենք մեկնելու: Կառավարությունը հրահանգ է տվել, որ մենք պատրաստ վիճակում լինենք. թե երբ կլինի` այս պահի ոչինչ չենք կարող ասել»,- ասաց մամուլի խոսնակը: Խումբը բաղկացած է փրկարարներից, պարամեդիկներից, թարգմանիչներից: Խմբում ընդգրկված է նաև մեկ շուն: