Գեղարքունիքի մարզի Շատջրեք գյուղի երեխաները ռազմագիտության առարկան ֆիզիկական կուլտուրայի համար նախատեսված սենյակում են անցկացնում, իսկ լաբորատոր դասընթացներ` սովորական դասասենյակներում:

Ռազմագիտության ուսուցիչ Վազգեն Բարսեղյանն ասում է, որ ինքը ստիպված է ռազմագիտության դասընթացն անցկացնում ֆիզիկական կուլտուրայի համար նախատեսված դահլիճում, քանի որ տանիքից կաթում է, ռազմագիտության դասընթացի համար նախատեսված սենյակը, ինչպես նաև ուսուցչանոցը, տնօրենի սենյակը, լաբորատորիան և զինանոցը «ջրի մեջ կորած են»:

Շատջրեքը Վարդենիսի տարածաշրջանի փախստականներով բնակեցված գյուղերից մեկն է, որտեղ համայնքի համար դպրոցի վերանորոգումը առաջնային խնդիրներից է: Արտաքին տեսքից ակնհայտ են պատուհանների կոտրված լինելն ու շենքի անմխիթար վիճակը: Շուրջ 10 տարի է` դպրոցն այդ վիճակում է: Ժամանակ առ ժամանակ մասնակի վերանորոգումներ եղել են, բայց դպրոցը չի հիմնանորոգվել:

Դպորցի երկու մասնաշենքերը տանիք ունեն, թիթեղապատվել են պետբյուջեի միջոցներով: Առանց տանիք է մնացել երրորդ մասնաշենքը: Հենց այդ շենքում են գտնվում ուսուցչանոցը, տնօրենի սենյակը, լաբորատորիան և ռազմագիտության դասընթացի համար նախատեսված սենյակն ու զինանոցը: Մշտական անձրևների պատճառով  «ջրի մեջ» հայտնված դպրոցին ռազմագիտության առարկայի համար զենք ևս չի հատկացվել:

Դպրոցը կենտրոնական ջեռուցման համակարգ չունի: Կոտրտված ապակիների, որոշ դասասենյակներում ապակիների բացակայության պատճառով սոլյարային յուղով ջեռուցումը ապահովում է առավելագույնը 14-15 աստիճան ջերմություն:

Գյուղապետ Զոյա Գևորգյանն ասում է, որ դպրոցի նախագիծը վատը չէ, բայց այն հիմնանորոգման կարիք ունի: «Հույս ունենք, որ դպրոցը 2012 թվականին ինչ-որ ծրագրով կվերանորոգվի: Հիմա առաջնայինը մյուս մասնաշենքի տանիքը փոխելն է, որ գոնե անձրևաջրերը չլցվեն դպրոց մինչև տեսնենք` երբ կվերանորոգվի»,-ասում է Զոյա Գևորգյանը:

Գեղարքունիքի մարզպետարանի աշխատակազմի կրթության, մշակույթի և սպորտի վարչության պետ Գարիկ Բադալյանը «Հետքի» հետ զրույցում տեղեկացրեց, որ մարզի 75 դպրոց հրատապ վերանորոգման կարիք ունեցող դպրոցների ցանկում է և ընդգրկված է 2011-13թթ.-ի մարզի սոցիալ-տնտեսական զարգացման ծրագրում: Իսկ այս տարի մարզում վերանորոգվել է 40 դպրոց: Կմտնի՞ Շատջրեքի դպրոցը 2012 թվականին վերանորոգվող դպրոցների ցանկում, թե ոչ, դեռևս պարզ չէ, կախված է նաև 2012-ի պետբյուջեի հատկացումներից:

680 բնակիչ ունեցող Շատջրեքի դպրոցում 82 աշակերտ է սովորում: Վերջին տարիներին աշակերտների թիվը կայունացել է: Շատջրեք գյուղն այս տարի 8 առաջին դասարանցի կունենա: 

Գյուղապետն էլ ասում է, եթե դպրոցի շենքը վերանորոգվի, շատջրեքցիները որոշ չափով իրենց բավարարված կզգան: «Մենք համաձայն ենք նույնիսկ, որ մեկ մասնաշենքը ամբողջությամբ վերանորոգվի, հետո նոր մնացածը, բայց անպայման պետք է տանիքը վերանորոգվի: Եթե տանիքը մնաց վթարային վիճակում, ինչ էլ անեն, միևնույն է, օգուտ չի տա, ջրերը քայքայում են»,-ավելացնում է գյուղապետ Զոյա Գևորգյանը: