Արդեն տեւական ժամանակ է՝ Արմավիրի մարզի քաղաքային զբոսայգին դադարել է ծառայել իր բուն նպատակին: Բազմիցս անդրադարձել ենք այն խնդրին, որ քաղաքային իշխանություններն այգին հատկացրել են անհատներին, որոնք էլ իրենց հերթին լայնածավալ շինարարություն են սկսել. այգու զգալի հատվածը վերածվել է շինհրապարակի:

Ըստ շրջանառվող լուրերի՝ ծառերի հաշվին այգում վեր է խոյանալու ԱԺ պատգամավոր Ռուբեն Հայրապետյանի բանկը, մյուս հատվածում էլ առեւտրի կենտրոն է կառուցվում: Այգին դիտավորյալ չի ոռոգվում, որպեսզի ծառերը չորանան: Ո՞վ գիտի, միգուցե մի պաշտոնյայի համար տարածք են ազատում: 

Եվ ահա քաղաքային իշխանությունները մարդկանց ոտքն այգուց ընդհանրապես կտրելու համար մի նոր բան են մտածել: Մոտ 20 օր է՝ զբոսայգու վճարովի զուգարանի մոտակայքում հաստ շղթայով ինչ-որ մեկը շուն է կապել: 

Մեր այցելության պահին շան առջեւ մեծ կաթսայով ջուր էր դրված ու մի քանի կտոր ոսկոր: Այգու հարեւանությամբ գտնվող խանութի աշխատողներն ասում էին, որ շունը սոված օրեր է անցկացնում, ամբողջ ցերեկ պառկում է, իսկ հովն ընկնելուն պես սկսում է ակտիվանալ ու մարդկանց վրա հաչել:

Այգում զբոսնող սակավաթիվ զբոսնողներից մեկն էլ ցույց տվեց, թե ինչպես են մարդիկ շան վախից իրենց կարիքները հոգում այգու ծառերի տակ եւ զուգարան չեն գնում:

Արմավիրի քաղաքապետարանի աշխատակազմի «Բարեկարգում տնօրինության» տնօրեն Արտակ Ավագյանը «Հետքի» հետ զրույցում տղայական խոսելաձեւով բացատրեց, որ եղածը մի մեծ բան չէ, շուն է, էլի:

«Ախպեր, ես շատ գիտեմ, թե ում շունն ա, մենք ստեղ պրիչո՞մ: Խոսքի՝ կարո՞ղ ա մենք ենք բերել կապել, որ ասում ես: Կարող ա տեր ունի, բերել կապել ա, մտել ա ազուգարան, հետո հելել, արձկել տարել ա: Էդ ի՞նչ բան ա, որ ասում ես»,- ասաց Արտակ Ավագյանը: Նա զարմացավ, երբ նշեցինք, որ երկար ժամանակ է, ինչ շունը կապված է այգում: 

«Ես հենց հիմա մարդ կուղարկեմ տեսնեմ, թե ինչ շուն ա: Բայց ո՞վ պիտի բերի ըտեղ շուն կապի, կամ ի՞նչ շուն պիտի ըլնի: Խոսքի՝ մեզ ի՞նչ, ընկեր ջան, շունը տեր ունի, թող տերը մտածի: Մենք կարձակենք, այդ շունն ըտեղից կէթա: Ես նոր եմ լսում, որ ընդեղ շուն են բերել կապել»,- ավելացրեց Ա. Ավագյանը: