Այսօր` ժամը 15:30-ին, «Կոնգրես» հյուրանոցում տեղի ունեցավ Հայաստանի ազգային մրցունակության հիմնադրամի (ՀԱՄՀ) կողմից կազմակերպված հանդիպումը Հայաստանի զբոսաշրջության ոլորտը ներկայացնող ընկերությունների հետ:

Բացման խոսքով հանդես եկավ ՀՀ Էկոնոմիկայի նախարարի տեղակալ Արա Պետրոսյանը:

ՀՀ Էկոնոմիկայի նախարար Տիգրան Դավթյանն իր ողջույնի խոսքում կարևորեց ՀԱՄՀ դերը զբոսաշրջության խթանման գործում: Նա ընդգծեց, որ անհրաժեշտ է համադրել ոլորտի մասնավոր հատվածի և ՀԱՄՀ-ի ներուժը զբոսաշրջության համատեղ ծրագրերի իրականացման և ոլորտի զարգացման համար:

ՀԱՄՀ գործադիր տնօրեն Արման Խաչատուրյանը նշեց, որ ՀԱՄՀ-ն, որպես զբոսաշրջության ոլորտի ծրագրերի պատասխանատու, կանի առավելագույնը ոլորտն առավել գրավիչ և մրցունակ դարձնելու նպատակով: Նա, մասնավորապես, մասնակիցներին ներկայացրեց ՀԱՄՀ զբոսաշրջության գրասենյակի ռազմավարական ծրագիրը և 2011 թվականի երկրորդ կիսամյակում իրականացվելիք ծրագրերը:

Քննարկվեցին նաև զբոսաշրջության ոլորտում Հայաստանի մրցունակության դերի կարևորությանը, դրա զարգացման միտումներին ու հեռանկարներին առնչվող հարցեր: Այս մասին հայտնում է Հայաստանի ազգային մրցունակության հիմնադրամը:

Լուսանկարը` Ֆոտոլուրի