«Հայկական ակնաբուժության նախագիծ» բարեգործական հիմնադրամը (ՀԱՆ) ԱՄՆ Միջազգային զարգացման գործակալության (ԱՄՆ ՄԶԳ) հետ իրագործվող "Առաջնային բուժօգնության և Ակնաբուժական ծառայությունների դաշինք" ծրագրի շրջանակներում 2008թ. ակնաբուժական ծառայություններ մատուցեց Հայաստանում եւ ԼՂՀ-ում:

2008թ. փետրվարից մինչև դեկտեմբերն ընկած ժամանակահատվածում Արմավիրի, Վայոց Ձորի, Սյունիքի և Արարատի մարզերում, Երևանի Աջափնյակ և Արաբկիր համայնքներում, ինչպես նաև առանձին ծրագրով ԼՂՀ-ում զննվել է 37800 մարդ, այդ թվում` մոտ 23400 երեխա: Աչքի շարժական հիվանդանոցում վիրահատվել կամ լազերային բուժում է ստացել 1086 մարդ: Բաժանվել է 6000-ից ավելի ակնոց: Բացի այդ, ՀԱՆ-ի և Հայկական միջազգային օֆթալմիկ միության համագործակցությամբ ակնային զննումներ են անցկացվել Երևանի, Սևանի և Կոշի կալանավայրերում:

Հայաստանի մարզերի և Երևանի պոլիկլինիկաների մոտ հիսուն ակնաբույժներ մասնակցել են ակնաբուժական վերապատրաստման ծրագրին: Վերապատրաստումն իրականացվել է «Հայկական ակնաբուժության նախագիծ» բարեգործական հիմնադրամի, Մալայանի անվան ակնաբուժական կենտրոնի և Կրթությամբ զարգացման ակադեմիայի համագործակցությամբ` ԱՄՆ Միջազգային զարգացման գործակալության կողմից հովանավորվող Մարդկային և ինստիտուցիոնալ ներուժի զարգացման ծրագրի շրջանակներում:

2009-ին ՀԱՆ-ի բժշկական խմբերը ձմռան ամիսներին կաշխատեն Երևանի անապահով համայնքներից մեկում: Գարնանից սկսած ՀԱՆ-ը բուժօգնության աշխատանքներ կծավալի Կոտայքի, Տավուշի, Լոռու և Շիրակի մարզերում: