Այսօր Ղարաբաղ այցելած ԵԱՀԿ Մինսկի խմբի համանախագահների ճեպազրույցի ժամանակ ամերիկացի համանախագահ Մեթյու Բրայզան լրագրողների խնդրանքով մեկնաբանել է լրատվամիջոցներում հայտնված` Բաքվում կատարած իր վերջին հայտարարությունը, թե Ղարաբաղը պետք է հողերը վերադարձնի Ադրբեջանին: Նա այդ առնչությամբ մասնավորապես նշել է.«Ես չեմ դա ասել, դա ասել են Ադրբեջանի շատ տաղանդավոր լրագրողները: Ինչ-որ մեկն ուզում է օգտագործել բոլոր խոսքերը` ի օգուտ այս կամ այն կողմի: Ինչ ես ասել եմ, դա այն է, որ եթե լինի պայմանագիր, դա կլինի բալանսավորված, ու պետք է արտահայտի եւ ադրբեջանական, եւ հայկական կողմի շահերը: Այո, մենք հուսով ենք, որ կլինի զորքերի դուրսբերում, եւ ոչ միայն` նաեւ միջանցք եւ այլն: Դրանք միջազգային նորմեր են, որոնք արտահայտված են մոսկովյան հռչակագրում, եւ որոնք կմտցվեն համաձայնագրում: Խոսքը ոչ միայն մեկ տարվա մասին է: Շատ էլեմենտներ կան»:

«Իսկ ինչ կլինի, եթե Ղարաբաղի ժողովուրդը չհամաձայնվի այդ համաձայնագրի հետ» հարցին նա պատասխանել է, որ չի կարող համաձայնագիր լինել` առանց Լեռնային Ղարաբաղի համաձայնության: Իսկ ռուսաստանցի համանախագահը շարունակելով գործընկերոջ միտքը շեշտել է, որ առանց Լեռնային Ղարաբաղի ներկայացուցիչների մասնակցության չի լինի համաձայնագրի տեքստի մշակում: Իսկ թե ինչպես է Յու. Մերզլյակովը դա պատկերացնում` չասաց, նշելով, որ կպատմեն գործընթացը սկսելու ժամանակ: Մեթյու Բրայզան նաեւ անդրադարձել է երկու երկրների նախագահների իրար նկատմամբ վերաբերմունքին, նշելով, որ «նախագահների միջեւ հարգանքի մակարդակն արդեն լուրջ է եւ աճում է»:

«Դա չի նշանակում, որ նրանք ընդհանուր լեզու են գտել, նրանք իրոք հարգում են միմյանց, եւ դա առաջին քայլն է: Այդ պատճառով մի քիչ լավատես պետք է լինել: Բայց դա չի նշանակում, որ մեծ առաջխաղացում է լինելու վաղը, կամ մյուս օրը: Մենք պետք է աշխատենք այդ ուղղությամբ»,-միտքն այսպես է եզրափակել ամերիկացի համանախագահը: