Երևանի քաղաքապետարանի նախաձեռնությամբ, երևանցիների և մայրաքաղաքի հյուրերի ամառային հանգիստն առավել հետաքրքրացնելու նպատակով, Ազատության հրապարակում եռափաչ նոր նկարների պատկերումն իրականացվել է «Երևանյան ամառ» ծրագրի շրջանակում: Այդ նպատակով երկրորդ անգամ Երևան է հրավիրվել 3D նկարիչ Նիկոլայ Արնդտը, ով երևանցիներին հայտնի է Ազնավուրի հրապարակում անցյալ տարի պատկերած «Ալիգատորներ» եռաչափ նկարով։ Նիկոլայ Արնդտի նոր ստեղծագործությունը  «Կարապի լիճ»  եռաչափ պատկերն է:

Զուգահեռ աշխատատել են նաև հայ երիտասարդ նկարիչներ, ովքեր ևս մի քանի այլ 3D պատկերներ են նկարել հրապարակում։

Ազատության հրապարակում նոր աշխատանքներին է ծանոթացել  նաև քաղաքապետի տեղակալ Դավիթ Օհանյանը:

«Մայրաքաղաքում եռաչափ նկարներ ունենալու նախաձեռնությունը լայն արձագանք գտավ երևանցիների շրջանում: Հաշվի առնելով այդ հանգամանքը՝ քաղաքապետի կողմից համապատասխան հրավեր եղավ Նիկոլայ Արնդտին: Այս տարի աշխատանքներում ներգրավվեցին նաև հայ երիտասարդ նկարիչներ: Կարծում եմ, նրանց համար սա լավ հնարավորություն էր և փորձ` հետագայում արդեն ինքնուրույնաբար եռաչափ պատկերներ ստանալու համար: Առհասարակ, եռաչափ նկարները Երևանի համար նոր մշակույթ են, սակայն մեծ տարածում ունեն աշխարհի շատ քաղաքներում»,-նշել է Դավիթ Օհանյանը:

Ազատության հրապարակում զբոսնող երևանցիներն ու նաև օտարերկրացիները շտապել են՝ առաջինը տեսնելու նկարներն ու լուսանկարվել պատկերների ֆոնին:

Ծրագիրը, ըստ նախաձեռնողների, շարունակական է լինելու և ընդգրկելու է նոր տարածքներ:  Այս մասին հայտնում է Երևանի քաղաքապետարանը: