Թերթի ունեցած տեղեկություններով` Ռուսաստանը թանկացրել է Հայաստանին մատակարարվող գազի գինը: Հազար խորանարդ մետր գազը այժմ Ռուսաստանը Հայաստանին է վաճառում 210 դոլարով` նախկին 180 դոլարի փոխարեն: 

Այս տեղեկատվության պաշտոնական հաստատում թերթը չի ստացել: «Հայռուսգազարդի» մամուլի պատասխանատու Շուշան Սարդարյանը ասել է միայն հետեւյալը. «Որքան ես տեղեկացված եմ, գազի գնի փոփոխություն տեղի չի ունեցել, այլապես «Հայռուսգազարդը» կդիմեր հանրային ծառայությունները կարգավորող հանձնաժողով` սպառողներին մատակարարվող գազի սակագինը փոխելու առաջարկով»: Թերթի տեղեկություններով` մաքսային ծառայությունը գազի ներկրման հետ կապված ձեւակերպումները առնվազն հուլիս ամսվա համար իրականացնելու է նոր գնով: Ինչ վերաբերում է բնակչությանը մատակարորվող գազի սակագնին, ապա, ըստ «ՀԺ»-ի, այն չի փոխվելու. «Հայռուսգազարդը» ընդամենը փոքրացնելու է իր կողմից ստացվող գազի գնի եւ սպառողներին վաճառվող գազի սակագնի տարբերությունը` մարժան: