Արցախի վարչապետ Արա Հարությունյանը հայաստանցի եւ արցախցի լրագրողների հետ հանդիպման ժամանակ ասաց, որ չի կարող մանրամասն ներկայացնել Ստեփանակերտի օդանավակայանի տեխնիկական խնդիրները՝ նշելով, որ դա վարչության պատասխանատուների գործն է: Հետաքրքիր է, սակայն, որ վերջիններս ենթարկվում են հենց վարչապետին ու հաշվետու են նրան, այնինչ Հարությունյանը օդանավակայանի շահագործման ժամկետներից հրաժարվում է խոսել:

«Մեր քաղաքացիները իրավունք ունեն օգտվել ցանկացած, այդ թվում՝ օդային տրանսպորտից: Տնտեսական առումով, սակայն, այն մեծ լիցք է տալու զբոսաշրջության զարգացմանը: Բազմաթիվ ուսումնասիրություններ ցույց են տվել, որ օդանավակայանի բացակայությունը խանգարում է զբոսաշրջության ծրագրերին, կամ տուրիստների այցելությունները նվազում են: Առաջին փուլում զարգանալու է զբոսաշրջությունը, իսկ հետո դա բերելու է տնտեսական ծրագրերի իրականացման»,- նշեց ԼՂՀ վարչապետը:

Վերջինիս ներկայացմամբ՝ «Հայաստան» համահայկական հիմնադրամի կողմից Ստեփանակերտի ջրի խնդրի լուծման համար հավաքվել է ընդամենը 3,5 մլրդ դրամ: «Բայց մենք այս տարիների ընթացքում կատարել ենք ավելի քան 18 մլրդ-ի շինաշխատանքներ: Շուշիում կառուցվել է ջրամատակարարման նոր քաղաքային ցանց, որը, սակայն, ամբողջությամբ չի ապահովում Շուշիի տարածքը: Մի մասը օգտվում է հին ցանցից: Քաղաքի ֆիլտր-կայանը դեռ չի վերանորոգվել»,- ասաց Հարությունյանը՝ ի պատասխան լրագրողի այն հարցի, որ Շուշիում դեռեւս ժանգոտ ջուր է հոսում ծորակից: Նա նշեց, որ քաղաքի որոշ թաղամասերում ժանգոտ ջրի առկայությունը պետք է պայմանավորել հենց հին ցանցի եւ ֆիլտ-կայանի գործունեությամբ:

Անցյալ տարվա ապրիլին կրկին ՀՀ լրագրողների հետ հանդիպման ժամանակ Ա. Հարությունյանը նշել էր, որ մինչեւ 2012-ի ավարտը մայրաքաղաքի 80 տոկոսը ապահովված է լինելու շուրջօրյա ջրով: «Ստեփանակերտում 90 տոկոսով ավարտվել ենք ներքին ցանցի կառուցման աշխատանքները: Հինը թողել ենք գետնի տակ: Այն ամբողջությամբ անկառավարելի էր, քանի որ չէինք իմանում, թե խողովակներով ջուրն ուր է գնում: Ոչ միայն ջրի հաշվառմանը, այլեւ քաղաքաշինությանն էր վտանգ սպառնում: Ջրընդունիչներից մինչեւ ֆիլտր-կայաններ ամեն ինչ նոր է: Ֆիլտ-կայաններից մեկը նոր է, մեկն էլ վերանորոգվել է: «Ֆիլտր-2» կայանում մի փոքր խնդիր ունենք վարարումների ժամանակ մեխանիկական ֆիլտրացման հետ, որը շատ չնչին ազդեցություն է թողնում ջրի որակի վրա»,- հայտարարեց վարչապետը՝ կարծիք հայտնելով, որ այսօր բոլոր ստեփանակերտցիները գոհ են ջրի մատակարարման որակից եւ քանակից:

Նրա ներկայացմամբ՝ ԼՂՀ մնացած ավելի քան 200 բնակավայրերը երկրի նախագահի հանձնարարականով մինչեւ 2018 թ. ունենալու են ամենօրյա ջուր: