ՀՀ մշակույթի նախարարությունը նոյեմբերի 20-ից 22-ին Երևանում կկազմակերպի հայկական գորգագործական մշակույթի ուսումնասիրման հիմնահար­ցերին նվիրված, «Հայկական հանգույց» խորագրով գիտաժողով:

Գիտաժողովի շրջանակներում կքննարկվեն հետևյալ թեմաները.

• Հայոց գորգագործական մշակույթի ուսումնասիրման ու տիպաբանման հիմնախնդիրները: Հայոց գորգարվեստի տեղը առաջավորասիական գորգագործական մշա­կույ­թի համակարգում:
• Հայկական գորգերի գեղազարդման համակարգի ու դրա առանձնահատկությունների մասին: Հայկական գորգերն արտերկրի թանգարաններում: Հայկական գոր­գերի մասնավոր հավաքածուների մասին:
• Հայկական գորգի, ասեղնագործության ու ժանյակի, մանրանկարչության, կիրա­ռա­կան ու մոնումենտալ արվեստի առարկաների գեղազարդման սկզբունքների փոխկապակցվածության մասին:
• Ավանդական և ժամանակակից գորգը:
• Գորգի վերանորոգման ժամանակակից տեխնոլոգիաների մասին:
• Գործվածքի թանգարանային հավաքածուների պահպանության, ցուցադրման և ուսումնասիրման հիմնախնդիրները:

Գիտաժողովին կարող են մասնակցել ոլորտի բոլոր շահագրգիռ անձինք և կազմակերպությունները: Մասնակցության հայտերն ընդունվում են մինչև հունիսի 10 [email protected] հասցեով: Զեկուցումների հակիրճ տեքստերն ընդունվում են մինչ հուլիսի 10 նույն հասցեով: