Այսօր նշվող պարի միջազգային օրվա կապակցությամբ Երևանի հանրակրթական դպրոցներում քաղաքապետարանի նախաձեռնությամբ մասնագետներն աշակերտներին կսովորեցնեն պարել հայկական ավանդական քոչարի:

Այսօր Երևանի քաղաքապետ Տարոն Մարգարյանը հանդիպել է ՅՈւՆԵՍԿՕ-ի Միջազգային պարային խորհրդի նախագահ Ալկիս Ռաֆտիսի հետ:

«Երևանը բազմաթիվ պետական ու մասնավոր պարախմբեր ունի, և մեր սաները, մասնակցելով միջազգային մրցույթներին ու փառատոներին, շատ հաճախ Հայաստան են վերադառնում պատվաբեր մրցանակներով»,- ասել է Տարոն Մարգարյանը:

Նա ընդգծել է, որ քաղաքապետարանը համագործակցում է պարային տարբեր խմբերի հետ՝ նրանց մշտապես ներգրավելով համաքաղաքային միջոցառումներում:

Ալկիս Ռաֆտիսն ասել է, որ պարի միջազգային օրվան նվիրված երևանյան միջոցառումների կազմակերպչական բարձր մակարդակը արդեն իսկ խոսուն վկայություն են, որ Երևանն իսկապես մշակութային հարուստ ավանդույթներով քաղաք է:

«Ինձ իսկապես հաճելի է գտնվել Ձեր գեղեցիկ քաղաքում և դրան զուգահեռ նաև արձանագրել, որ իսկապես մեծ աշխատանք է տարվել Պարի միջազգային օրը Երևանում ըստ արժանվույն անցկացնելու համար: Այդ ամենն արդեն իսկ հուշում է, որ տոնն իսկապես կվերածվի տոնախմբության»,- ասել է Ալկիս Ռաֆտիսը:

Նա նշել է, որ իր լիազորությունների շրջանակում կանի հնարավորը, որ պարի ամենամյա միջազգային համաժողովը հաջորդ տարի անպայման անցկացվի Երևանում: Այս մասին հայտնում է Երևանի քաղաքապետարանի տեղեկատվության և հասարակայնության հետ կապերի վարչությունը: