Մարդու իրավունքների պաշտպանի 2012 թ. զեկույցի քննարկման ժամանակ ՄԻՊ Կարեն Անդրեասյանին «մշակույթի ամենաանպաշտպան ոլորտի` կերպարվեստի» վերաբերյալ հարց ուղղեց ԱԺ ՀՀԿ խմբակցության պատգամավոր Շուշան Պետրոսյանը:

Ըստ նրա` կերպարվեստը եւ երգարվեստը ներառված չեն ՄԻՊ զեկույցներում: Շուշան Պետրոսյանը, բերելով մի քանի փաստեր, նշեց, որ ՄԻՊ-ը պետք է շտապ ուսումնասիրի ոլորտը:

«Կիրառությունից վերացել է արվեստանոց բառը: Արվեստանոցները կցվել են հասարակական նշանակության տարածքներին եւ հավասարապես հարկվում են կազինոների եւ խանութների չափով` գումարած կոմունալ ծախսերը: Խոսքը վերաբերում է նկարիչներին, որոնք գտնվում են ծանր պայմաններում: Ով հնարավորություն ունի, սեփականաշնորհում է տարածքը եւ բնակարանների հարկերի չափով վճարումներ անում»,- նշեց Շուշան Պետրոսյանը:

Պատգամավորը նշեց, որ Հայաստանը միակ երկիրն է, որ նման վերաբերմունք ունի կերպարվեստի եւ նկարիչների նկատմամբ:

Ինչ վերաբերում է երգարվեստին, ապա Շուշան Պետրոսյանի ասելով, երբ տարիներ առաջ կենդանի հնչողության մասին օրենք է ընդունվել, դա իրեն ուրախացրել է, քանի որ ոլորտը զգալի մաքրվել է: Սակայն` դրանով պաշտպանվել են հանդիսատեսի իրավունքները, իսկ կատարողի իրավունքները պաշտպանված չեն:

Պատգամավորի խոսքերով` բեմի վրա կան պարտադիր գործոններ, որոնք ապահովում են լավ հնչողություն, սակայն եղել են համերգներ, երբ ինքը երգել է Տրոցկու ժամանակաշրջանի բարձրախոսներով:

«Ես այս հարցը բարձրացնում եմ առանց վախի, որովհետեւ կենդանի երգողներից եմ, բայց սա շատ կարեւոր վերաբերմունք է արտիստների նկատմամբ եւ ոտնահարում է մեր իրավունքները»,- նշեց Շուշան Պետրոսյանը:

Պատգամավորի երրորդ հարցը վերաբերում էր Քարվաճառի 3840 մ բարձրության վրա գտնվող դիրքերին, որոնք պահում են զինվորները: Ըստ պատգամավորի` ձմռանը ճանապարհներն անանցանելի են լինում, քանի որ մոտ 2 մ ձյուն է լինում, եւ «երիտասարդ մանչուկները», 60 կգ ծանրության բեռը կրելով, բարձրացնում են վերեւ:

«Զինվորական ծառայությունից արձակված անձանց սոցիալական իրավունքների պաշտպանության տեսանկյունից ի՞նչ կարծիքի եք, հնարավո՞ր է Քարվաճառում երկամյա ծառայությունից հետո զինվորներին ապահովել գոնե մեկամսյա անվճար բուժօգնությամբ, որովհետեւ երիկամների, հիպերտոնիայի եւ ողնաշարի հետեւանքներ են ունենում»,- ՄԻՊ-ին դիմեց Շուշան Պետրոսյանը:

Կարեն Անդրեասյանն ասաց, որ պատգամավորի հարցերն իրեն դրեցին անհարմար դրության մեջ, քանի որ «աշակերտի նման պետք է ընդունենք բոլոր այն քննադատությունը, երբ չենք կարողացել տեղեկատվությունը բացահայտել»:

«Ինձ համար քննադատությունը ցավոտ է այն առումով, որ մենք չենք պատկերացրել այդ ոլորտը: Ձեր բարձրացրած երեք խնդիրներն էլ նոր էին մեզ համար: Ես պետք է կարողանայի այնպես անել, որ միայն ես կարողանայի տեղեկություն տալ մարդու իրավունքներին վերաբերող խնդիրներով: Բայց հիմա այնպես է ստացվում, որ ես եմ Ձեզնից ծանոթանում որոշակի խնդիրների մասին»,- նշեց մարդու իրավունքների պաշտպանը:

Նա պատգամավորին հավաստիացրեց, թե բարձրացված հարցերն ընդունվեցին ի գիտություն, եւ արագ արձագանք կլինի:

Կարեն Անդրեասյանն ասաց, որ բարձրացված խնդիրների վերաբերյալ իրենց տեղեկություններ չեն հասել այդ իսկ պատճառով դրանց չեն տիրապետում, եւ խնդրեց՝ եթե նման տեղեկություններ լինում են, դիմեն ՄԻՊ գրասենյակ:

«Հրավիրում եմ Ձեր գրասենյակից որեւէ մեկին ինձ հետ մեկամսյա շրջագայության սահմանով, շատ խնդիրների կծանոթանան»,-արձագանքեց Շուշան Պետրոսյանը: