«Հետքը» երեկ անդրադարձել էր արցախյան ազատամարտի 500 մահապարտներից մեկի` ազատամարտիկ Աղասի Կարապետյանի 77-ամյա մոր խնդրին:

Աղասի Կարապետյանը քիչ առաջ տեղեկացրեց, որ իրեն անհայտ մի քաղաքացի պատրաստակամություն է հայտնել վճարել 635 հազար դրամը, եւ վաղը այդ գումարը մուտք կարվի հիվանդանոցի հաշվեհամարին:

«Անկեղծ եմ ասում, չեմ ճանաչում, թե ով է այդ գումարը տվել: Բայց ի սրտե շնորհակալ եմ նրան եւ այն քաղաքացիներին, ովքեր անտարբեր չգտնվեցին եւ իրենց աջակցությունը հայտնեցին»,-ասաց Աղասին:

Նա տեղեկացրեց, որ մինչ այս պահը թե կառավարությունից, թե պետական այլ մարմիններից արձագանք չի եղել:

Հիշեցնենք, որ  2011թ. նոյեմբեր-դեկտեմբեր ամիսներին ազատամարտիկի մոր` Խանում Կարապետյանի  առողջական վիճակը վատացել է եւ հանպատրաստի, շտապօգնության ավտոմեքենայով նրան հասցրել են Երեւանի Մխիթար Հերացու անվան պետական բժշկական համալսարանի թիվ 1 կլինիկական հիվանդանոց:

Բժիշկները պահանջել են վճարում կատարել, քանի որ անհապաղ պետք է կորոնոգրաֆիա եւ ստենդավորում արվեր: Աղասին պատմել էր, որ այդ պահին չի կարողացել վճարում անել, իսկ այդ վիճակով չէր կարող մորը տուն տանել, ուստի խնդրել է իր ստորագրությունը տալ, որով պարտավորվում է հետագայում վճարել պահանջված գումարը:

Հետագայում մի կերպ 400 հազար դրամը վճարել  են, իսկ մնացած 635 հազար դրամն առ այսօր չեն կարողացել վճարել, եւ Երեւանի Մխիթար Հերացու անվան պետական բժշկական համալսարանը արդեն դիմել է դատարան` Խանում Կարապետյանից պահանջելով գումարի մնացած մասի վճարումը: