ԱԺ պատգամավոր Հրանտ Բագրատյանը շատ կարեւոր համարեց Ազգային ժողովում քննարկվող տնտեսական մրցակցության պաշտպանության պետական հանձնաժողովի 2013 թ. տարեկան գործունեության ծրագիրը՝ դա կապելով տնտեսության զարգացման հետ:

Ըստ Հրանտ Բագրատյանի` այսօր լուծելով մրցունակ ավիաընկերության աշխատանքի հարցը, Հայաստանում զբոսաշրջիկների թիվը կեռապատկվի, իսկ ՀՆԱ-ն 11 մլրդից 2 տարում կդառնա 25-30 մլրդ դրամ:

«Դա տեղի չի ունենում, որովհետեւ իրականում իշխող քաղաքական էլիտան սիրում է կառավարվող պետություն, սիրում է միացնել բիզնեսը, կառավարումը՝ սեփականության հետ եւ սիրում է մեզ ներկայացնել այնպիսի հանձնաժողովի նախագահ, որ տեսեք նա անում է, բայց  իրականում ոչինչ չի անում եւ արդարացնում է այդ գործունեությունը»,- ասաց Հրանտ Բագրատյանը:

Ըստ պատգամավորի` ընկերությունը գերիշխո՞ղ է, թե՞ ունի մենաշնորհ, միեւնույն է խանգարում է երկրի զարգացմանը:

«Հանձնաժողովի նախագահն ասում է, որ հանրապետությունում կարիք չկա երկրորդ շաքարի գործարանի կառուցել: Այսինքն` ինքն է որոշում կարիք կա՞, թե՞ ոչ: Իսկ կարիք կա՞ր առաջին գործարանը բացել, իհարկե` չկար: Դուք լավ գիտեք, որ այդ գործարանը երբեք շահութաբեր չի լինելու. կառուցվել է նրա համար, որպեսզի անընդհատ վկայակոչեք, թե մենք գործարան ենք կառուցել, թողեք շաքարի մոնոպոլիան շարունակվի: Մարդիկ այդ մի մոնոպոլիայից ստանում են 100 միլիոն, ոչինչ՝ դրանից 10 մլն դրել, գործարան են կառուցել»,- նշեց Հրանտ Բագրատյանը:

Պատգամավորի խոսքերով` մարդիկ լավ գիտեն, որ իրենք գերիշխող դիրք են ստանում, տասնյակ միլիոնների շահույթ են ստանում եւ ամեն անգամ վճարում են դրա 1-3 տոկոսի չափով տուգանք, եւ բոլորիս թվում է, թե ՏՄՊՊՀ հանձնաժողովն աշխատում է:

«Իրականում նա արդարացնում է այդ արատավոր հանգամանքը»,- ավելացրեց Հրանտ Բագրատյանը:

Պատգամավորն ասաց, որ տնտեսագիտությանն անհարիր երեւույթ է, երբ հայտարարվում է, թե մեկ շաքարի գործարանը հերիք է, էլցանցերը բնական մենաշնորհ է:

«Նման կարգի, նման մակարդակ, կրթական ցենզ ունեցող մարդկանց  ծրագիրը այստեղ ոչ միայն չպետք է հաստատենք, այլեւ հստակ արտահայտենք մեր կարծիքը, որ իրավունք չունեն նման պատասխանատու կառույց գլխավորել»,-ասաց պատգամավորը: