«Ինձ համար միանշանակ է. սա ժողովրդի հաղթանակն է, ժողովրդի, որի շրջանում Րաֆֆի Հովհաննիսյանը կարողացավ համոզիչ, գրավիչ զարթոնքի ալիքը բարձրացնել: Ժողովուրդը հավատաց իրեն և հավատաց Րաֆֆի Հովհաննիսյանին», - այսօր Ազատության հրապարակում Րաֆֆի Հովհաննիսյանի հանրահավաքի ժամանակ «Հետքի» հետ զրույցում հայտարարեց ՀՅԴ խմբակցության նախկին պատգամավոր Լիլիթ Գալստյանը:

Նրա կարծիքով` անգամ այն ընտրողները, ովքեր չեն մասնակցել քվեարկությանը, և շուրջ 50 հազար անվավեր քվեարկողներն իրենց այդ քայլով գնահատակն են տվել իշխանություններին: Բացի այդ` միայն պաշտոնապես շուրջ կես միլիոն մարդ «ոչ» է ասել այդ իրականությունը:

«Այդ իրականությունը հեռանկար չունի, իսկ ժողովուրդը ոտքի է կանգնել՝ վերջ տալու այդ իրականությանը», - նշեց Լ. Գալստյանը:

Լ. Գալստյանի խոսքերով` Րաֆֆի Հովհաննիսյանն իր խոսքում  շեշտադրումը դնում է երկրի անվտանգությունն ու կայունությունը չվտանգելու հարցի վրա:

«Թե իր քարոզարշավը, թե այս օրերին այստեղ ծավալվող իրադարձությունները հայրենիքը սիրելու և հանուն Հայաստանի պետականության գաղափարի շուրջ է: Ես կարծում եմ, որ մեր իշխանությունները, եթե խելամիտ և խոհեմ են, եթե իրապես գնահատում են երկրի կայունությունը և սոցիալական համերաշխությունը, պարզապես իրավունք չունեն հաշվի չնստել այս իրողության հետ», - հայտարարեց Լ. Գալստյանը:

Նրա խոսքերով` այս շարժման հիմքում պետք է ընկած լինի ՀՀ ազգային շահը, արժանապատիվ պետություն և քաղաքացի ունենալու տեսլականը: Իսկ քաղաքացիները պետք է հասկանան, որ տանը նստած «երկնիքից իրենց համար արդար, ապահով Հայաստան չի թափվելու», այլ պայքարը պետք է տարվի մինչև հաղթանակ:

«ՀՀ յուրաքանչյուր քաղաքացի պետք է հասկանա, որ ինքը նաև արդարության զինվոր է: Մեզ արթնացող, պահանջատեր քաղաքացի է հարկավոր», - հավելեց Լ. Գալստյանը: