Այս տարի «Արի տուն» ծրագիրը կմեկնարկի հունիսի 20-ին և կանցկացվի մինչև սեպտեմբերի 25-ը 10 փուլով: Բյուջեով նախատեսված է մասնակիցների թիվը հասցնել 800-ի: Ծրագրի մասնակիցները 10 օր ապրելու են հյուրընկալ ընտանիքներում և 4 օր ճամբարում` Աղվերանում:

«Արի տուն» ծրագրի առաջին փուլին կմասնակցի 81 երեխա` Ֆրանսիայից, Ռումինիայից, Ռուսաստանից, Թուրքիայից, Ավստրալիայից, Վրաստանից, Իսպանիայից: Երեխաները կբնակվեն Երևանի Նոր Նորք, Աջափնյակ, Քանաքեռ-Զեյթուն, Շենգավիթ, Էրեբունի, Մալաթիա-Սեբաստիա, Կենտրոն, Արաբկիր, Դավթաշեն, Ավան, Արարատի մարզի Վեդի, Այնթապ, Խարբերդ համայնքներում:

Հունիսի 20-ին «Արի տուն» ծրագրի առաջին փուլի բացմանը կմասնակցեն ՀՀ սփյուռքի նախարարը, առողջապահության, կրթության և գիտության, մշակույթի, պաշտպանության և այլ նախարարությունների, Արագածոտնի, Գեղարքունիքի, Արմավիրի, Արարատի մարզպետարանների, ինչպես նաև հյուրընկալող ընտանիքների ներկայացուցիչներ:

ՀՀ սփյուռքի նախարարության սփյուռքի երիտասարդության` Հայաստան պարբերական այցելություններ կազմակերպելու և անցկացնելու «Արի տուն» ծրագիրը հաստատվել է կառավարության 2011 թ. մարտի 18-ի N 10 որոշմամբ:

Ծրագրի նպատակն է սփյուռքահայ երիտասարդներին ճանաչելի դարձնել Հայաստան հայրենիքը, նրանց մեջ արմատավորել ազգային արժեքային համակարգ, ծանոթացնել հայ ընտանիքին, հայ մարդու հոգեկերտվածքին, աջակցել Հայաստան-սփյուռք բարոյահոգեբանական, կրթամշակութային մերձեցմանը: Այս մասին հայտնում է սփյուռքի նախարարության մամուլի և հասարակայնության հետ կապերի վարչությունը:

Լուսանկարը` flickr.com-ից