Քիչ առաջ «Ֆլեշ-Թեգետա Մոտորս» ՍՊԸ-ն հաղորդագրություն տարածեց Հայաստանում նոր, եվրոպական ստանդարտներով, մուլտիբրենդային ավտոսերվիսի բացման մասին: 

Վաղը` ժամը 14:00-ին Երևանում` Ռուբինյանց 31 հասցեում  բացվելու է «Ֆլեշ-Թեգետա Մոտորս» ընկերության գլխամասային գրասենյակը և Հայաստանում առաջին մուլտիբրենդային սերվիս-կենտրոնը՝ եվրոպական ստանդարտներին համապատասխան:  Այս համատեղ` «Ֆլեշ-Թեգետա Մոտորս» ՍՊԸ-ի հիմնադիրներից է Նարեկ Բեգլարյանը` Բարսեղ Բեգլարյանի (Ֆլեշի Բարսեղ) որդին:  Չնայած` մամուլի հարցով պատասխանատուն «Հետքին» ասաց, որ բիզնեսի հիմնադիրները ոչ թե Բարսեղ Բեգլարյանի որդին, այլ հենց ինքը` Բ. Բեգլարյանն է:

ՀՀ էլեկտրոնային ռեգիստրի տվյալներում հենց Նարեկ Բեգլարյանի անունն է, ինչպես նաև վրացի երկու անձանց` Թեմուր Կոչոձեի և Գիորգի Մշվիլդաձեի: 

Թեմուր Կոչոձեն Վրաստանի խորհրդարանի նախորդ գումարման պատգամավոր էր` «Միասնական ազգային շարժումից», իսկ Գիորգի Մշվիլդաձեն TEGETA MOTORS-ի գլխավոր տնօրենն է:

««Ֆլեշ-Թեգետա Մոտորս» ընկերությունը կկիրառի «Թեգետա Մոտորս» ընկերության 17 տարիների ընթացքում կուտակած փորձը:  Այն առաջին մուլտիբրենդային սերվիս-կենտրոնն է Հայաստանում, հագեցած ժամանակակից սարքավորումներով, եվրոպական ստանդարտներին համապատասխան` սպասարկման բարձր մակարդակով:

Բացման արարողությանը ներկա կլինեն բարձրաստիճան պաշտոնյաներ, խոշոր կազմակերպությունների ղեկավարներ, դեսպաններ և հյուպատոսներ, ինչպես նաև հյուրեր «Թեգետա Մոտորս» ընկերությունից և արտասահման պրեմիում բրենդերի ներկայացուցիչներ արտերկրից՝ ՌԴ, Գերմանիա, Ճապոնիա, Չինաստան, Ուկրաինա և այլն:

Վրացական «Թեգետա Մոտորս» ընկերության ավտոտեխսպասարկման կայաններ գործում են Վրաստանի տարբեր քաղաքներում՝ Փոթիում, Քութաիսիում, Ախալցխայում, Բաթումում, Թբիլիսիում և այլն:

Հայաստանյան շուկայում «Ֆլեշ-Թեգետա Մոտորս»-ը ներկայացնում է հետևյալ բրենդերը,  մարտկոցներից՝ Optima, Energizer, Daewoo, Loxa և այլն, անվադողերից՝ Hankook, Goodrich, Bridgestone, Michelin, Goodyear և այլն, զտիչներից՝ Filtron, Hengst, Fleetguard, Japanparts և այլն:

Նշենք, որ ընկերության մոտ 80 աշխատակիցներից  9-ը Սիրիայից տեղափոխված մեր հայրենակիցներն են: Դեռ կան ևս 8 թափուր աշխատատեղեր, որոնք առաջիկա օրերին կհամալրվեն, այդ թվում նաև, սիրիահայ մասնագետներով»,- հայտնում է «Ֆլեշ-Թեգետա Մոտորս» ՍՊԸ-ն: