Նոյեմբերի 17-ին, Հայ առաքելական սուրբ եկեղեցու Վիրահայոց թեմի «Հայարտուն» մշակույթի կենտրոնի Գալուստ Գյուլբենկյան սրահում կայացավ ցուցահանդես-շնորհանդես՝ նվիրված հայ գրքի տպագրության 500-ամյակին: Այն համատեղ  կազմակերպել էին  Վիրահայոց թեմի «Հայարտուն» մշակույթի  կենտրոնը և  Վրաստանի հայ  գրողների «Վերնատուն» միությունը: Միջոցառումը հովանավորել էր ՀՀ մշակույթի,  երիտասարդության և  սպորտի հարցերով  նախարարությունը:

Միջոցառմանը ներկա էին Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը, Վրաստանում ՀՀ դեսպանության խորհրդական Լևոն Թորգոմյանը, գրող-բանաստեղծ Գիվի Շահնազարը,  Վրաստանի հայ գրողների «Վերնատուն» միության անդամները, գրականասեր հասարակայնության ներկայացուցիչներ Թբիլիսիից, Ջավախքից, երիտասարդ ստեղծագործողներ:

Ցուցադրվել էր գոյության 17 տարիների ընթացքում Վրաստանի հայ գրողների «Վերնատուն»  միության հրատարակած 140-150  անուն գրքերի գրեթե կեսը: Դրանք Թբիլիսիից, Վրաստանի այլ տարածաշրջաններից միությանը անդամագրված  հեղինակների առանձին գրքեր էին, տարեգրքեր և ժողովածուներ: Բացելով ցուցահանդես-շնորհանդեսը` Վիրահայոց թեմի «Հայարտուն»  մշակույթի կենտրոնի  համակարգող  Լևոն Չիդիլյանը նշեց, որ սա  հայ գրքի տպագրությանը նվիրված մշակույթի կենտրոնի հերթական միջոցառումն է և այսօր արդեն «Հայարտուն» մշակույթի կենտրոնի օժանդակությամբ տպագրված  գրքերի թիվը դարձավ  յոթը, ինչը իրավամբ հպարտանալու  տեղիք է տալիս: Ընթերցողի սեղանին դրվեցին Վրաստանի հայ գրողների «Վերնատուն» միության ավագ, միջին և երիտասարդ  սերնդի  հեղինակների գրքերը, որոնք հրատարակվել են Վիրահայոց թեմի «Հայարտուն» մշակույթի կենտրոնի  միջնորդությամբ և  Գալուստ Գյուլբենկյան  հիմնադրամի նյութական աջակցությամբ:

Վարելով երեկոն` Վրաստանի հայ գրողների «Վերնատուն» միության նախագահ Գևորգ Սնխչյանը կարևորեց Վիրահայոց առաջնորդի և  «Հայարտուն» մշակույթի կենտրոնի գործունեությունը, ում անբասիր  աշխատանքի արգասիքը նաև այս երեք նոր գրքերի   շնորհանդեսն է: Ավագ սերնդից՝ Խաժակ Եփրիկյանի  պատմվածքների ժողովածուի  հրատարակությունը  նվիրվել է հեղինակի ծննդյան 90-ամյակին, և դա  մանկավարժ-գրողի   երկրորդ գիրքն է` «Կոմիտասի չինարին» գրքից հետո:

Ընթերցողի սերնդին դրվեց նաև  միջին սերնդի ստեղծագործող Սիլվա Սիփանուհու «Սիրո մրցանակ» բանաստեղծությունների ժողովածուն, որը նվիրվում է նրա  ծննդյան 55-ամյակին: Սա բանաստեղծուհու  անդրանիկ ժողովածուն է, թեև  նա բազմիցս տպագրվել է Վրաստանի և Հայաստանի  պարբերականներում: Խորին երախտագիտությամբ բազմազավակ մայրը ընթերցեց իր ամուսնու՝  Գուրի  Եթերի բանաստեղծությունը՝ նվիրված   շնորհանդեսին:

Երիտասարդ սերնդի ստեղծագործող Արաքսը (Արաքսյա Սնխչյանը) ընթերցասեր հասարակայնությանը ներկայացավ «Ուրիշ  լուսնից»  բանաստեղծությունների  երկրորդ ժողովածուով: Նրա  առաջին գիրքը  լույս է տեսել 2003 թվականին «Վերնատուն» միության «Ծիլեր» ակումբի «Առվակներ» մատենաշարով և կոչվում է  «Հույսի կանթեղ»:

«Ծիլեր» ակումբի գործունեությունը և  Արաքսի բանաստեղծական առաջին քայլերը ներկայացրեց բանասիրական գիտությունների դոկտոր, պրոֆեսոր Էմմա Ախտյանը:

Գնահատանքի և օրհնության իր խոսքում Վիրահայոց թեմի առաջնորդը, շնորհավորելով հեղինակներին գրքերի հրատարակության կապակցությամբ, նշեց, որ Վրաստանի, հատկապես Ջավախք աշխարհի հայությունը, որտեղ էլ նա գտնվելիս լինի,միշտ էլ նվիրումով է վերաբերվում իր ծննդավայրին, իր  հայրական տուն ու տեղին: Իսկ Վրաստանը այն երկիրն է, որտեղ զարգանում են բազմազգ ժողովուրդների  գրականությունը, մշակույթը, որի   մասն ենք նաև մենք՝ հայերս:

Շնորհանդեսին բնորոշ խոսքն ու մեկնաբանությունն ընդմիջվում էր գեղեցիկ  ասմունքով, որով հանդես եկավ Թբիլիսիի Պետրոս Ադամյանի անվան հայպետդրամայի թատրոնի դերասանուհի Մելանիա Բարսեղյանը: Վաստակաշատ ուսուցչուհի Ռոզա Զոհրաբյանի նախաձեռնությամբ, վերոհիշյալ հեղինակների ստեղծագործություններից հատվածներ և բանաստեծություններ  ընթերցեցին թիվ 104 դպրոցի  աշակերտներ Լիզա Թորոսյանը, Դայանա Համբարձումյանը և  Արամ Մելիքյանը: Հուզիչ էր հատկապես Արաքսի՝ սեփական բանաստեղծությունների ընթերցումը: Երևանի կոնսերվատորիայի շրջանավարտներ Մալվինա և Իլոնա Համբարձումյանների դաշնամուրային հիասքանչ կատարումները առանձնահատուկ  հմայք հաղորդեցին պոեզիայի գեղեցիկ երեկո դարձած ցուցահանդես-շնորհանդեսին:

Վիրահայոց թեմի մամլո դիվան