Կառավարությունն այսօրվա նիստում ընդունել է գույք օտարելու որոշում, որի համաձայն «Հանա տրանս» ՍՊԸ կողմից ԼՂՀ-ից ածխի տեղափոխումն արդյունավետ կազմակերպելու համար նախատեսվում է Վարդենիս քաղաքում գտնվող երկաթգծի նախկին հյուրանոցի շենքը ուղղակի վաճառքի ձևով օտարել «Հանա տրանս» ՍՊԸ-ին։ Ածուխն օգտագործվելու է Երևանի ջերմաէլեկտրակայանի հին կայանում ջուր-ածխային վառելիքով էլեկտրաէներգիայի արտադրության նպատակով։ Շենք, շինությունների ընդհանուր մակերեսը կազմում է 501,9 քառ. մետր: Օտարման ենթակա գույքի վաճառքի գինը սահմանվել է 950 000 ՀՀ դրամ: Շենք, շինությունների զբաղեցրած, օգտագործման և սպասարկման համար հատկացված հողամասը կազմում է 0.29 հա: 

«Հանա տրանս» ՍՊԸ-ն ՀՀ կառավարության էլեկտրոնային ռեգիստրում գրանցված է Նարեկ Սարգսյանի անվամբ: Նարեկ Սարգսյանը հանրապետության նախագահ Սերժ Սարգսյանի եղբոր` Սաշիկ Սարգսյանի որդին է: 

Ըստ որոշման նախագծի` 2012թ. «Հանա  Տրանս» ՍՊԸ-ն գրությամբ դիմել է ՀՀ էներգետիկայի և բնական պաշարների նախարարությանը` տեղեկացնելով, որ ԼՂՀ-ում արդյունահանվող ածխի հումքով «Երևանի ՋԷԿ» ՓԲԸ-ի տարածքում նախատեսվում է ջուր-ածխային վառելիքի արտադրության կազմակերպում և այդ ծրագրի շրջանակներում նախատեսվող տարեկան շուրջ 2000 տոննա ածխի տեղափոխումը (ծանրաքարշ ավտոմեքենաներով) ԼՂՀ-ից մինչև Վարդենիսի երկաթուղային կայարան և այդտեղից երկաթուղով մինչև ք. Երևան պետք է իրականացվի «Հանա Տրանս» ՍՊԸ-ի  կողմից:  Ելնելով աշխատանքի կազմակերպման անհրաժեշտությունից՝ ընկերությունը խնդրել է ՀՀ Գեղարքունիքի մարզի Վարդենիս քաղաքում գտնվող երկաթգծի նախկին հյուրանոցի շենքը ՀՀ օրենսդրությամբ  սահմանված կարգով օտարել ընկերությանը: 

2012թ. հունիսի 22-ի «Գույք հանձնելու մասին» N755-Ա որոշման համաձայն՝ Հայաստանի Հանրապետության սեփականությունը հանդիսացող ՀՀ Գեղարքունիքի մարզի Վարդենիս քաղաքում գտնվող երկաթգծի նախկին հյուրանոցի շենքը (501,9 քառ. մետր մակերեսով կիսաքանդ շինություն, սկզբնական արժեքը՝ 1837500, մնացորդային արժեքը 0 դրամ) և 0,29 հա մակերեսով հողամասը  ՀՀ տրանսպորտի և կապի նախարարության կողմից հետ է վերցվել «Հարավկովկասյան երկաթուղի» ՓԲԸ-ին փոխանցված կոնցեսիոն ակտիվների կազմից ու հանձնվել է «ՀՀ էներգետիկայի և բնական պաշարների նախարարության աշխատակազմ» ՊԿՀ-ի տնօրինությանը: Էներգետիկայի և բնական պաշարների նախարարության և «Կռունկ» ՍՊԸ-ի միջև 2012թ. օգոստոսի 17-ին կնքված աշխատանքների կատարման պայմանագրի համաձայն «Կռունկ» ՍՊԸ-ի կողմից 2012թ. օգոստոսի 20-ին իրականացվել է ՀՀ Գեղարքունիքի մարզի Վարդենիս քաղաքում գտնվող երկաթգծի նախկին հյուրանոցի և հողամասի շուկայական գնահատում՝ համաձայն որի գնատատված արժեքը կազմել է 950 000 դրամ: Գույքի արժեքի որոշման համար նախատեսված գումարը կազմում է 112 000 ՀՀ դրամ:

Ներկայացված նախագծով առաջարկվել է գույքն ուղղակի վաճառքով օտարել «Հանա Տրանս» ՍՊԸ-ին: «Հանա  Տրանս» ՍՊԸ-ն նախատեսում է այն օգտագործել որպես բազա: