Եվրամիության խորհուրդը սահմանափակող միջոցներ է կիրառել տասը անձանց նկատմամբ՝ ՌԴ-ում ընդդիմության ճնշմանն աջակցելու և ժողովրդավարությունն ու օրենքի գերակայությունը էապես խաթարելու համար:

Ցուցակում ներառվել են ՌԴ Գերագույն դատարանի երեք դատավոր և Գլխավոր դատախազության մեկ պաշտոնյա։ 

Ըստ Խորհրդի՝ նրանք ներգրավված են եղել 2026 թվականի սեպտեմբերին Պետական դումայի ընտրություններին «Յաբլոկո» կուսակցության գրանցումը չեղարկելու գործողություններում:

Ցուցակում ընդգրկվել են նաև «Յաբլոկո» կուսակցության փոխնախագահ, ընդդիմադիր քաղաքական գործիչ Լև Շլոսբերգին դատապարտած դատավորն ու մեղադրող դատախազը։

Հիշեցնենք, որ Լև Շլոսբերգը ռուսական բանակը վարկաբեկելու և ռուս-ուկրաինական պատերազմի վերաբերյալ կեղծ լուրեր տարածելու համար դատապարտվել է 11 տարի 1 ամիս ազատազրկման: 

Շլոսբերգը մասնակցել էր ռուս-ուկրաինական  պատերազմի վերաբերյալ առցանց բանավեճին և իր սոցիալական ցանցերում տարածել էր Daily Mirror թերթում հրապարակված հոդվածի գլխավոր լուսանկարը, որում պատկերված էր Վլադիմիր Պուտինը և արյունոտված ուկրաինացի մի կին։

Ցուցակում ընդգրկվել են նաև «Յաբլոկո»-ի մյուս առաջնորդների՝ Մաքսիմ Կրուգլովի և Նիկոլայ Ռիբակովի դատավարություններում ներգրավված դատավորները:

Սահմանափակող գործողությունները ենթադրում են ակտիվների սառեցում, իսկ ԵՄ քաղաքացիներին և ընկերություններին արգելվում է նրանց տրամադրել դրամական միջոցներ, ֆինանսական ակտիվներ կամ տնտեսական ռեսուրսներ։

Ընդհանուր առմամբ, Խորհրդի պատժամիջոցների ցուցակում այժմ ներառված է 108 անհատ և 7 իրավաբանական անձ։

Հիշեցնենք, որ Ռուսաստանում Պետդումայի ընտրություններից առաջ՝ օգոստոսի 11-ին, Ռուսաստանի Գերագույն դատարանը չեղարկել էր «Յաբլոկո» կուսակցության գրանցումը: 

Կուսակցությանն ընտրություններից դուրս թողնելու հայցով դատարան էր դիմել պրոիշխանական «Ռոդինա» կուսակցությունը, և դատարանը բավարարել էր հայցը:

«Յաբլոկո»-ն միակ հակապատերազմական դիրքորոշում ունեցող կուսակցությունն էր։

Լուսանկարները՝ yabloko.ru-ի