Քննչական կոմիտեի ՀԿԳ քննության գլխավոր վարչության (մարդկանց թրաֆիքինգի, անչափահասների սեռական անձեռնմխելիության դեմ ուղղված և թմրամիջոցների ապօրինի շրջանառության հանցագործությունների քննության վարչություն) և ՀՀ ԱԱԾ Երևան քաղաքի վարչության ծառայողների համատեղ ծավալուն գործողությունների արդյունքում բացահայտվել է թմրամիջոցների ապօրինի շրջանառությամբ և մաքսանենգությամբ զբաղվող հանցավոր խումբ։

Քննչական կոմիտեի տարածած հաղորդագրության համաձայն՝ 2024-2026 թվականների ընթացքում խումբը «Տելեգրամ»-ի առցանց խանութ-հարթակների միջոցով, շահադիտական դրդումներով, իրականացրել է առանձնապես խոշոր չափերով թմրամիջոցների ապօրինի շրջանառություն և մաքսանենգություն: 

Պարզվել է խմբի ղեկավար Ա.Վ.-ի և նրա կնոջ ինքնությունը: Վերջիններս ձերբակալվել են ՀՀ պետական սահմանը հատելու փորձի ժամանակ և ներկայացվել վարույթն իրականացնող մարմնին:

Վերջիններս ձերբակալվել և ներկայացվել են վարույթն իրականացնող մարմնին, երբ փորձել են հատել ՀՀ պետական սահմանը:

«Հավաքված ապացույցների հիման վրա նրանց նկատմամբ հարուցվել է հանրային քրեական հետապնդում՝ Քրեական օրենսգրքի 393-րդ հոդվածի 3-րդ մասի 2-րդ կետով (առանձնապես խոշոր չափերով թմրամիջոցների ապօրինի իրացնելը):

Կատարված քննչական գործողությունների և ձեռնարկված օպերատիվ-հետախուզական համալիր միջոցառումների արդյունքում բացահայտվել է հանցավոր խմբի անդամներից ևս մեկը, ում բնակարանի խուզարկությամբ հայտնաբերվել և առգրավվել են շուրջ 2 կգ տարբեր տեսակի թմրամիջոցներ և դրանք իրացնելու համար անհրաժեշտ պարագաներ:

Խմբի ղեկավարը կալանավորվել է, նրա կնոջ նկատմամբ որպես խափանման միջոց կիրառվել է տնային կալանքը։

Քրեական վարույթի նախաքննությունը շարունակվում է, կատարվում են ծավալուն վարութային գործողություններ՝ հանցավոր սխեմայում ներգրավված մյուս մասնակիցների ինքնությունները պարզելու և նրանց քրեական պատասխանատվության ենթարկելու համար»,– նշված է հաղորդագրությունում: