Հայաստանում արձանագրվում են համակարգչային հափշտակության նոր և վտանգավոր դեպքեր։ Խարդախները, օգտագործելով քաղաքացիների վստահությունը, կեղծ գովազդների միջոցով հասանելիություն են ստանում նրանց ֆինանսական միջոցներին։

Այս մասին պաշտոնական հայտարարությամբ ահազանգում է ՆԳՆ կիբեռոստիկանությունը:

Ինչպե՞ս է գործում խարդախության սխեման

–Կեղծ գովազդներ սոցցանցերում. Facebook և Instagram հարթակներում «Telcell Wallet»-ի անունից տարածվում են գրավիչ գովազդներ, որոնք քաղաքացիներին խոստանում են մեկ ամիս անվճար օգտվել Երևանի հասարակական տրանսպորտից։

–Կեղծ հղումներ և կոդի պահանջ. Գովազդի հղումով անցնելուց հետո քաղաքացիներից պահանջվում է մուտքագրել իրենց հեռախոսահամարին ստացված SMS հաստատման կոդը։

–Գումարների հափշտակում. Հենց քաղաքացին տրամադրում է կոդը, հանցագործները լիարժեք հասանելիություն են ստանում նրա «Telcell Wallet» հաշվին։ Արդյունքում՝ նրանք գողանում են ինչպես դրամապանակում եղած գումարը, այնպես էլ դրան կցված բանկային քարտերի ֆինանսական միջոցները։

Ոստիկանությունը կոչ է անում ցուցաբերել առավելագույն զգոնություն և հետևել անվտանգության այս կանոններին.

–Մի՛ անցեք սոցիալական ցանցերում տարածվող կասկածելի հղումներով, նույնիսկ եթե դրանք ներկայացվում են հայտնի կազմակերպությունների անունից:

–Երբեք և ոչ մեկին մի՛ տրամադրեք SMS հաղորդագրությամբ ստացված հաստատման կոդերը, գաղտնաբառերը կամ այլ անձնական տվյալներ:

–«Telcell Wallet»-ի հետ կապված ցանկացած գործողություն կատարեք միայն պաշտոնական հավելվածի միջոցով:

Հիշե՛ք. Խարդախները հաճախ օգտագործում են գրավիչ առաջարկներ, անվճար ծառայություններ կամ ակցիաներ՝ ձեզ մոլորեցնելու և ձեր գումարներին տիրանալու համար: Եղե՛ք իրազեկ և պաշտպանված: