«Հայաստան» կուսակցությունների դաշինքի  ներկայացուցիչները` Տաթևիկ Սողոյանը և Հովհաննես Խուդոյանը, Սահմանադրական դատարանում հանդես եկան եզրափակիչ ելույթով: Նշեցին, որ ՍԴ իրենց դիմումի հիմքում ընկած է քաղաքացին: ՍԴ-ում դատաքննության ընթացքում ընտրողը վերլուծել և հասկացել է, որ Կենտրոնական ընտրական հանձնաժողովն ընտրական գործընթացներում անգործություն է դրսևորել:

«Մենք հասկացանք, որ կարելի է ասել՝ չենք ունեցել Կենտրոնական ընտրական հանձնաժողով, քանի որ չի կատարել իր առաքելությունը, չի ապահովել հավասար ու ազատ ընտրական իրավունքի իրացում»,- ասում է Հովհաննես Խուդոյանը:

Տաթևիկ Սողոյանի դիտարկմամբ՝ Կենտրոնական ընտրական հանձնաժողովը գործել է պարզապես «կանցելարիա»: Պարզապես հասցեագրել է այն դիմումները, որոնց պետք է անդրադառնար, որի համար օրենքով պարտավորված է եղել: Ըստ ներկայացուցչի՝ ոչ մի պատճառաբանություն ընդունելի չէ, քանի որ ԿԲ-ն իրականացրել է «զրո վարչական վարույթ»: Ըստ ներկայացուցչի՝ ի վերջո Կենտրոնական ընտրական հանձնաժողովին է վերապահված ընտրական գործընթացների վերահսկողությունը:

Փոխարենը, ըստ Հ. Խուդոյանի, գրություն է հասցեագրել քննչական մարմիններին, որպեսզի հաղորդագրություններում չտարածեն նաև քաղաքական ուժերի անունները, ստացել է ոչ իրավաչափ մերժում, և ասել են՝ «դե չի ըլնի, չի ըլնի»:

Տաթևիկ Սողոյանը նշեց, որ Արթիկ և Մարտունի համայնքներում աշխատանքային ժամին  վարչական ղեկավարների ուղիղ հրահանգով համայնքի ամբողջ աշխատակազմը մասնակցել է «Քաղաքացիական պայմանագիր» կուսակցության քարոզարշավին: Դրա վերաբերյալ ոչ վարչական, ոչ քրեական վարույթներ չեն հարուցվել:

«Զրո մարդ է ենթարկվել պատասխանատվության, և այդպես էլ ամեն ինչ մնացել է անհետևանք»,- ասում է Տ. Սողոյանը՝ հավելելով, որ փաստացի երկու իշխանական մարմինների կողմից վառվել է կանաչ լույս, որպեսզի ինչքան ցանկանան, այդքան չարաշահեն վարչական ռեսուրսը:

Ներկայացուցիչները հարց բարձրացրին, եթե վերահսկողություն այդպես էլ չի լինելու, ապա այն ինչի համար է պետք, ինչի համար է պետք Կենտրոնական ընտրական հանձնաժողովը:

«Ավելի լավ է Կենտրոնական ընտրական հանձնաժողովը փակել, փոխարենն այդ գումարը պետական բյուջեից հատկացնել «Դոմինո Փրոդաքշնին», որն ավելի լավ կկազմակերպի այդ միջոցառումները»,- ասում է Հովհաննես Խուդոյանը:

Անդրադառնալով թոշակների բարձրացմանը, առողջության ապահովագրությանը՝ «Հայաստան» դաշինքի ներկայացուցիչները նշեցին, որ քարոզարշավի ընթացքում դրանք դարձել են քարոզարշավի մաս:

Ներկայացուցիչներից Տ. Սողոյանը հույս հայտնեց, որ Սահմանադրական դատարանը նախընտրական հիմնադրամի գումարների, ծախսերի չափին անդրադարձ կկատարի: Սողոյանը նշեց, որ «Քաղաքացիական պայմանագիր» կուսակցության կատարած ծախսը 1 մլն դոլարով գերազանցել է թույլատրելի շեմը: Հենց այդ հանգամանքը պետք է հիմք դառնար, որպեսզի կուսակցությունը դուրս մնա քաղաքական պայքարից:

Հովհաննես Խուդոյանն, անդրադառնալով զինվորների քվեարկության դեպքերին, ասաց, որ երբ նրանք շարունակել են քվեարկել ժամը 20:00-ից հետո, ԿԸՀ-ն քայլեր չի ձեռնարկել, որպեսզի այն կանխի, և վերջում անվավեր են ճանաչվել տեղամասի քվեարկության արդյունքները, որի բացասական հետևանքները կրում է ընտրողը:

Ներկայացուցիչները նշեցին, որ այդպես էլ ԿԸՀ նախագահը չի պատասխանել ՍԴ դատավորների հարցին, թե մինչև 3 ընտրատեղամասերի արդյունքներն անվավեր ճանաչելը, «Բարգավաճ Հայաստան» կուսակցությունը քանի տոկոս ձայն է հավաքել: Մինչդեռ, եթե անվավեր չճանաչվեին արդյունքները՝ ԲՀԿ-ն հավաքելու էր 4%:

Անդրադառնալով քարոզարշավի ժամանակ վարչապետ և ՔՊ կուսակցության առաջնորդ Նիկոլ Փաշինյանի «կզցնելու եմ», «դու ինչու չես զոհվել», «գետինը մտնես» արտահայտություններին, Տաթևիկ Սողոյանը նշեց, որ դրանք ընդունելի չեն կարող լինել: ՍԴ-ին խնդրեց դրան անդրադարձ կատարել, որպեսզի հետագայում դրանք բացառվեն քաղաքական խոսույթից: Իսկ Հ. Խուդոյանը նշեց, որ երբ նույն տոնով իրենց հետ են խոսում, ընդդիմախոսները «փռվում են ասֆալտին» կամ ձերբակալվում են, ենթարկվում քրեական հետապնդումների:

Վերջում Հովհաննես Խուդոյանը նշեց, որ նույնիսկ Սահմանադրական դատարանի դատավորները չեն հնչեցրել գեթ մեկ ուղիղ հարց, որը կարող էր վնասել իշխող ուժի շահերին:

Հիշեցնենք՝ Սահմանադրական դատարանում 2026թ. հունիսի 26-ին մեկնարկել է յոթ քաղաքական ուժերի դիմումների հիման վրա գործի քննությունը։ Այն վերաբերում է 2026թ. հունիսի 7-ի Ազգային ժողովի հերթական ընտրությունների արդյունքներն ամփոփելու վերաբերյալ Կենտրոնական ընտրական հանձնաժողովի թիվ 259-Ա որոշմանը։ Նշված գործերը միավորվել են և քննվում են նույն նիստում, քանի որ վերաբերում են նույն հարցին:

2026թ. հունիսի 14-ի նիստում ԿԸՀ-ն, ամփոփելով ընտրությունների վերջնական արդյունքները, որոշեց, որ խորհրդարան է անցել երեք քաղաքական ուժ՝ «Քաղաքացիական պայմանագիր» կուսակցությունը (64 մանդատ), «Ուժեղ Հայաստան» (29 մանդատ) և «Հայաստան» (12 մանդատ) կուսակցությունների դաշինքները։