Էջմիածնի թիվ 14/19 ընտրատեղամասը գտնվում է դպրոցի երկրորդ հարկում, ինչն անհարմարություններ է առաջացնում ընտրողների համար։ Հատկապես տարեց ու հենաշարժողական խնդիրներ ունեցող ընտրողները դժվարությամբ են հասնում քվեախցիկին։

Տեղամասում գտնվելու ժամանակ հենաշարժողական խնդիր ունեցող ընտրողը թոռան օգնությամբ կարողացավ վերև բարձրանալ։ Թեև չցանկացավ անունը հայտնել, սակայն տեսախցիկի առջև ասաց, որ դժվարությամբ է հասել տեղամաս: 73 տարեկան է, առաջին անգամ է մասնակցում ընտրությանը՝ հանուն իր երեխաների ու թոռների ապագայի։

Հանձնաժողովի նախագահ Գյուլնարա Սարգսյանը «Հետքի» հետ զրույցում ասաց, որ տեղամասը մատչելի տեղամաս չէ։ Հետևաբար շարժվելու դժվարություններ ունեցողները նախապես պետք է դիմում ներկայացնեին լիազոր մարմնին ու ընտրելու իրավունքն իրացնեին մատչելի տեղամասում։

Հանձնաժողովի նախագահի փոխանցմամբ՝ եղել են դեպքեր, որ ընտրողը դժվարությամբ է բարձրացել երկրորդ հարկ։ Նրանց օգնել են ոստիկանները։