Քաղաքաշինության կոմիտեն հայտնում է, որ ապրիլի 1-ից սկսվում է բազմաբնակարան շենքերի կառավարիչների վերապատրաստման գործընթացը։ Օրենսդրական նոր փոփոխություններով՝ այսուհետ կառավարիչները պետք է ունենան մասնագիտական որակավորում՝ շենքերի ավելի արդյունավետ կառավարումն ապահովելու համար։

«Վերապատրաստմանը կարող են մասնակցել ինչպես գործող կառավարիչները, այնպես էլ այն անձինք, ովքեր ցանկանում են զբաղվել կառավարչի գործունեությամբ:

Դիմումները և կից փաստաթղթերն անհրաժեշտ է ներկայացնել մինչև մարտի 13-ը Քաղաքաշինության կոմիտեի [email protected] էլեկտրոնային հասցեով կամ e-request.am էլեկտրոնային հարթակով։ Վերապատրաստման մեկնարկի մասին հայտարարությունը, դիմումի ձևը և դասընթացի ծրագիրը հրապարակված են Քաղաքաշինության կոմիտեի www.minurban.am կայքի «Ծրագրեր» բաժնի «ԲԲՇ կառավարիչների վերապատրաստում» ենթաբաժնում։

Վերապատրաստման ծրագրի իրականացման հայտ է ներկայացրել Ճարտարապետության և շինարարության Հայաստանի ազգային համալսարանը։ Այլ վերապատրաստողների ծրագրերի առկայության դեպքում տեղեկատվությունը կհրապարակվի կոմիտեի կայքի նշված բաժնում։ Դասընթացները լինելու են շարունակական:

Հիշեցնենք, որ «Բազմաբնակարան շենքի կառավարման մասին» օրենքում կատարված փոփոխություններով և Կառավարության որոշմամբ՝ շենքերի կառավարման գործառույթներ իրականացնող անձանց՝ կառավարիչների համար սահմանվել են մասնագիտական որակավորման պահանջներ՝ բազմաբնակարան շենքերի արդյունավետ կառավարմանը նպաստելու նպատակով:

Նոր կարգավորումների համաձայն՝ թե՛ դասընթացի մասնակիցների, թե՛ ինքնուրույն վերապատրաստված անձանց գիտելիքներն ստուգվելու են թեստավորման եղանակով: Երկու տարվա ընթացքում վերապատրաստման չդիմած, ինչպես նաև մի քանի թեստավորումների արդյունքում բավարար միավորներ չստացած կառավարիչների տվյալները տրամադրվելու են համայնքներին՝ վերջիններիս նախաձեռնությամբ կառավարման մարմնի լիազորությունները դադարեցնելու հարցով սեփականատերերի ժողով հրավիրելու նպատակով»,-նշված է հաղորդագրությունում: