Այսօր Երևանում մեկնարկել է Գնդակային հրաձգության Եվրոպայի առաջնությունը։ Մրցումային առաջին օրը հայ հրաձիգները մեդալներ են նվաճել։

«Շարժվող թիրախ (նորմալ վազք) մրցաձևի կանանց եզրափակչում մրցեցին Հայաստանի երկու ներկայացուցիչները` Լիլիթ Մկրտչյանն ու Գոհար Հարությունյանը: Եվրոպայի առաջնությունում 4-րդ անգամ չեմպիոն դարձավ Լիլիթ Մկրտչյանը՝ եզրափակչում 8:6 հաշվով առավելության հասնելով Գոհար Հարությունյանի նկատմամբ: Այս վարժությունում երրորդն Ուկրաինայի ներկայացուցիչ Մարգարիտա Կարկանին է:

Երիտասարդ աղջիկների պայքարում ոսկին ու արծաթը ևս նվաճեցին Հայաստանի երկու ներկայացուցիչները` Լիլիթ Մկրտչյանն ու Անահիտ Սարգսյանը: Երրորդը Ալինա Կտալկանն է։

Տղամարդկանց պայքարում ոսկե, արծաթե ու բրոնզե մեդալների հաջորդաբար արժանացան շվեդ Զեսպեր Նիբերգը, լեհ Լուկաս Սզապլան ու ֆին Յուհանի Վուրիման:

Երիտսարդներ տղաների պայքարում ոսկու արժանացավ ֆին Էրիկ Վիլկմանը, արծաթի` ուկրաինացի Դմիտրո Կրավեցը և բրոնզի` Ռոման Բերեզիցսկին»,- նշվում է հաղորդագրության մեջ:

Գնդակային հրաձգության Եվրոպայի առաջնությունն առաջին անգամ է անցկացվում Հայաստանում։ Առաջնությանը մասնակցում են մարզիկներ աշխարհի 40 երկրից, խաղարկվում է մեդալների 70 հավաքածու։ Հայաստանը ներկայանում է 26 մարզիկով:

Առաջարկում ենք դիտել Եվրոպայի փոխչեմպիոն Գոհար Հարությունյանի մասին պատմող տեսանյութը.