Էրնստ ֆոն Սիմենսը (1903–1990) գերմանական հայտնի Siemens ընկերության հիմնադրի՝ Վերներ ֆոն Սիմենսի ժառանգներից էր։ Չնայած իր ինժեներական և արդյունաբերական գործունեությանը՝ նա առավել հայտնի դարձավ որպես մշակութային գործիչ, բարերար, դասական և ժամանակակից երաժշտության մեծ աջակից։

Էրնստ ֆոն Սիմենսը համոզված էր, որ արվեստը, հատկապես երաժշտությունը, ունի հիմնարար դեր հասարակության մշակութային և մտավոր զարգացման մեջ։ Այդ համոզմամբ նա 1972 թվականին հիմնադրեց Ernst von Siemens Music Foundation-ը, որի նպատակն էր աջակցել բարձրարժեք երաժշտություն ստեղծողներին, խթանել նորարարությունը և գնահատել այն հեղինակներին, որոնք ձևավորում են երաժշտության ապագան։

Էրնստ ֆոն Սիմենսի երաժշտական մրցանակը դարձավ համաշխարհային մակարդակի հեղինակավոր պարգև։ Այն ամենամյա երաժշտական ​​մրցանակ է, որը շնորհվում է երաժիշտներին Բավարիայի գեղարվեստի ակադեմիայի (Bayerische Akademie der Schönen Künste) կողմից. գեղարվեստական խորության, ազդեցության, ստեղծագործական բարձր արժեքի համար։ Siemens Music Prize-ը անվանում են «երաժշտության Նոբելյան մրցանակ»։

2026 թվականի հունվարի 22-ին հայտարարվեց այս տարվա Siemens Music Prize-ի գլխավոր դափնեկրի անունը։ Այն շնորհվեց վիոլա դա գամբայի վիրտուոզ կատարող, կատալոնացի Ժուրդի Սավալին (Jordi Savall) երաժշտության մեջ բացառիկ ավանդի, միջնադարյան, վերածննդի, բարոկկո շրջանի  ստեղծագործությունների, կատարողական ավանդույթների ուսումնասիրման և տարածման համար։

Գլխավոր մրցանակից բացի, ամեն տարի շնորհվում է նաև կոմպոզիտորական մրցանակ՝ Composer Prizes։ Կարևոր այս հարթակում երեք մրցանակակիրների մեջ էր 32-ամյա կոմպոզիտոր Հովիկ Սարդարյանը։ Ծնունդով Արցախից երիտասարդ կոմպոզիտորի երաժշտական ուղին սկսվել է Հադրութի երաժշտական դպրոցից, հետո՝ Ստեփանակերտի Սայաթ-Նովա երաժշտական քոլեջ, Երևանի պետական կոնսերվատորիա՝ Աշոտ Զոհրաբյանի կոմպոզիտորական դասարան։ Հովիկը վերջին տասը տարիներին սովորում և ստեղծագործում է Գերմանիայում։

Siemens Music Prize-ի թիմը տարիների ընթացքում հետևում է ստեղծագործողի աշխատանքին, կազմվում են փակ առաջարկություններ (nominations), որոնք չեն հրապարակվում,  անկախ ժյուրին ուսումնասիրում է թեկնածուների ստեղծագործությունները, ազդեցությունը, կատարումները միջազգային հարթակներում և նրանց դերը ժամանակակից երաժշտության զարգացման մեջ։

Siemens Music Prize-ի պաշտոնական կայքում գերմանացի երաժշտագետ Հաբակուկ Տրաբերն այսպես է բնորոշել այս տարվա մրցանակակիր կոմպոզիտոր Հովիկ Սարդարյանին. «Արվեստը մեզ հետ խոսում է և պահանջներ է ներկայացնում։ Իր վառ ստեղծագործական անհատականությամբ աչքի ընկնող Հովիկ Սարդարյանը դրա օրինակն է (...) Նա միավորում էր հայկական մոնոդիայի հատկանիշները՝ կլավիրային երգի ժանրի մեջ։ Սարդարյանն արևմտյան գործիքներից ստանում էր այնպիսի հնչողություններ, որոնք հիշեցնում են ավանդական հայկական երաժշտական գործիքները, և այս տարբեր տարրերի համադրությունը նրա համար բացում է նոր ստեղծագործական հեռանկարներ»։

Լուսանկարները՝  Ernst von Siemens Music Foundation կայքից