Երևան քաղաքի ընդհանուր իրավասության դատարանը՝ դատավոր Մասիս Մելքոնյանի նախագահությամբ, քիչ առաջ որոշեց 2 ամսով կալանավորել Մայր Աթոռի դիվանապետ Արշակ արքեպիսկոպոս Խաչատրյանին։

Հիշեցնենք, երեկ՝ դեկտեմբերի 4-ին, Քննչական կոմիտեի շենքում, ձերբակալել են Մայր Աթոռի դիվանապետ Արշակ արքեպիսկոպոս Խաչատրյանին։ Նրան համացանցում տարածված տեսանյութի գործով հրավիրել էին հարցաքննության: Սակայն, երբ հարցաքննությունն ավարտվել է, և արքեպիսկոպոսը ցանկացել է լքել շենքը, նրան դիմավորել են Ազգային անվտանգության ծառայության աշխատակիցները՝ հայտնելով քննիչի` ձերբակալման որոշման մասին։

Քրեական վարույթի նախաքննության ընթացքում Արշակ սրբազանի նկատմամբ հարուցվել է հանրային քրեական հետապնդում՝ Քրեական օրենսգրքի 393-րդ հոդվածի 2-րդ մասի 1-ին և 4-րդ կետերով (մի խումբ անձանց կողմից նախնական համաձայնությամբ թմրամիջոց ապօրինի իրացնելը՝ հանդիսադիր վայրում):

Այսօր՝ կալանքի միջնորդության քննությունից առաջ, դատարանի բակում Արշակ արքեպիսկոպոս Խաչատրյանի փաստաբան Արսեն Բաբայանը լրագրողների հետ զրույցում արդեն կանխատեսել էր, թե ինչ որոշում է կայացնելու դատարանը, հատկապես, երբ միջնորդությունը քննում է դատավոր Մասիս Մելքոնյանը։ Փաստաբանը կարծիք էր հայտնել, որ կալանքի որոշումն արդեն գրված, պատրաստ է։