Վահան Կոստանյանի՝ ՄԱԿ-ի կենտրոնակայանում արված հայտարարությունից անցել է ավելի քան երեք ամիս, սակայն արտաքին գործերի նախարարությունից դեռ հստակ պատասխաններ չեն տալիս Պաղեստինի վտանգված մշակութային ժառանգությունը Մատենադարանում ժամանակավորապես պահելու նախաձեռնության մասին։

Հիշեցնենք, որ 2025 թվականի հուլիսի 29-ին ՄԱԿ-ի կենտրոնակայանում կազմակերպված Պաղեստինի հարցի խաղաղ կարգավորման և երկու պետություն սկզբունքի իրագործման հարցով միջազգային բարձրաստիճան համաժողովի ընթացքում ԱԳ նախարարի տեղակալ Վահան Կոստանյանն անդրադարձել էր Հայաստանի և Պաղեստինի համագործակցությանը՝ հայտարարելով, որ Պաղեստինի վտանգված մշակութային ժառանգությունը ժամանակավորապես կհանգրվանի Մատենադարանում։

Գրավոր հարցում ուղարկեցինք ԱԳՆ, ճշտելու՝ ո՞ր մշակութային արժեքներն են նախատեսվում Պաղեստինից բերել Մատենադարան, ե՞րբ և ինչպե՞ս կկատարվի տեղափոխումը, արդյո՞ք դրանք ցուցադրվելու են, թե պահոցներում կմնան, որքա՞ն ժամանակ կպահվեն, արդյո՞ք մշակվել է հուշագիր կամ պաշտոնական փաստաթուղթ, և ո՞ր կողմը կվճարի ծախսերն ու կկատարի տեղափոխումը։

ԱԳՆ-ից պատասխանեցին, որ նախագիծը գտնվում է համաձայնեցման փուլում, և նախագծի վերաբերյալ հարցերին հնարավոր կլինի պատասխանել միայն «վերջինիս ավարտական փուլում»։

Դեռ օգոստոսին էինք փորձել ծրագրի վերաբերյալ մանրամասներ ճշտել։ ԱԳՆ-ից միայն նշել էին, որ «ծրագրի կյանքի կոչմանը միտված իրավական փաստաթղթի նախագիծը գտնվում է մշակման փուլում»։

• Պաղեստինի մշակութային ժառանգության պահպանումը Հայաստանում․ հստակ պայմանավորվածություններ դեռ չկան

Նույն հարցումն ուղարկել էինք նաև Մատենադարան։ Ինստիտուտի հանրային կապերի բաժնից հայտնեցին, որ հայտարարության մասին տեղեկացել են ԱԳ փոխնախարարի ելույթից։ Նշեցին, որ դեռ տեղեկություն չունեն, թե երբ է սկսվելու գործընթացը։

Նախաձեռնության մանրամասները ճշտելու համար հարցումներ էինք ուղարկել նաև Պաղեստինի մշակույթի նախարարությանը և վարչապետի աշխատակազմին, սակայն պատասխան չենք ստացել։