Սեպտեմբերի 9-ին կայանալիք ՏԻՄ ընտրություններին Լոռու մարզի Հաղպատ գյուղի գործող գյուղապետ Սերգո Քառյանը, առողջական խնդիրների պատճառով, չի առաջադրել իր թեկնածությունը:

Նրա փոխարեն գյուղապետի թեկնածու է առաջադրվել որդին` Վահրամ Քառյանը: Գյուղապետ ընտրվելու համար առաջադրվել են նաև Հաղպատի նախկին գյուղապետ Ռուբեն Վարոսյանը (Ավարա Ռուբոն) և ներկայիս գյուղապետի տեղակալ Սուրեն Մաթոսյանը:

Վերջինս երեկ «Հետքին» հայտնեց. «Երևի վաղը, մյուս օրը ես ինքնաբացարկ հայտարարեմ: Մի քիչ գյուղապետարանի գործերս կթեթևացնեմ ու կգնամ Վանաձոր էդ գործով: Ես Վահրամ Քառյանի օգտին եմ հանում թեկնածությունս»:

Վահրամ Քառյանը Հանրապետական կուսակցության անդամ է, թեկնածուներ Ռուբեն Վարոսյանը և Սուրեն Մաթոսյանը անկուսակցական են: Մեզ հետ զրույցում Վահրամ Քառյանը գյուղի հիմնախնդիրներից կարևորեց խմելու ջրի ներքին ցանցի կապիտալ վերանորոգումը: «Ուզում ենք Ագարակ-Նոյեմբերյան ջրագծից ջուր քաշենք գյուղ»,- ասաց նա:

Մինչև օրս հաղպատցիները օգտվում են գյուղի «Միլ» և լեռնային այլ աղբյուրներից: Հաղպատի ջրամատակարարման խնդիրը լուծելու համար գյուղապետ Սերգո Քառյանը նամակ է ուղարկել նախագահ Սերժ Սարգսյանին, ինչից հետո մասնագետներ են եկել գյուղ՝ խնդիրն ուսումնասիրելու:

«Ըստ նրանց՝ ջրի ներքին ցանցի կապիտալ վերանորոգման համար անհրաժեշտ է 65 մլն դրամ»,- ասաց Վահրամ Քառյանը: Նոյեմբերյան-Ագարակ ջրագիծն անցնում է Հաղպատի ներքին հատվածի տնամերձերի միջով: «Այդտեղից պետք է ջուրը պոմպերով բարձրացնենք գյուղի 500 տոննա տարողությամբ ջրամբար: Գյուղի 2-րդ ջրամբարը պետք է մեծացվի»,- հավելեց թեկնածուն:

Ըստ նրա՝ առաջիկայում կսկսվեն Հաղպատի խմելու ջրի ներքին ցանցի կապիտալ վերանորոգման նախագծանախահաշվային փաստաթղթերի պատրաստման աշխատանքները: Հաղպատը ընդգրկված է ՀՀ կառավարության հավանությանն արժանացած «Հյուսիսային դարպաս» ծրագրում: Ծրագրով նախատեսվում է գյուղը դարձնել զբոսաշրջության կենտրոն:

«Տուրիզմի զարգացման ենթակառուցվածքներ գյուղում ստեղծվում են: Արդեն 4-5 հյուրատուն ունենք: Մեկն էլ կառուցվում է: Տուրիստները փոքր հյուրատները գերադասում են մեծ հյուրանոցներից: Սա նկատել են նաև հաղպատցիները և գնում են դրան»,- ասաց Վահրամ Քառյանը: Նրա կարծիքով՝ գյուղի կանաչ գոտիներում պետք է կառուցվեն ժամանցի փոքրիկ տաղավարներ, որպեսզի զբոսաշրջիկներն օգտվեն բնությունից:

Թեկնածուն գյուղի ամենակարևոր խնդիր համարեց Հաղպատի կոյուղու համակարգի ստեղծումը: Ըստ Վահրամ Քառյանի՝ գյուղում ծայրահեղ աղքատ ընտանիքներ չկան, քանի որ գյուղացիների մեծ մասը զբաղվում է անասնապահությամբ և կարողանում է իր ընտանիքի գոյությունը պահպանել: «Մի ժամանակ հաղպատցիները վաճառում էին իրենց ունեցած կովը, որ նպաստ ստանան: Հիմա հասկանում են, որ էդ կովը իրեն ավելի շատ եկամուտ է բերում, քան 18 000 դրամ նպաստը»,- ասաց Վահրամ Քառյանը:

Գյուղապետարանի գույքագրման գրքում գրանցված է 470-ից ավելի խոշոր եղջերավոր անասուն: Վահրամ Քառյանը տեղեկացրեց, որ գյուղի ոռոգման ներքին ցանցը դաշտեր չի հասնում, այդ պատճառով էլ գյուղացիները ցորեն չեն ցանում:

Վահրամ Քառյան նշեց որպես գյուղապետ պաշտոնավարման 4 տարում հոր՝ Սերգո Քառյանի կատարած աշխատանքները: «Գյուղի փողոցներում 67 լուսակետ է ստեղծվել: Հայրս անտառը փրկելու համար գյուղը գազաֆիկացրեց ՀՀ կառավարության կողմից համայնքի բյուջեին տրված բնապահպանական սուբվենցիաներով: Չորս ճյուղերով գազը գյուղ է մտել: Հաղպատն արդեն 80-ից ավելի գազի բաժանորդներ ունի: Մանկապարտեզը կապիտալ վերանորոգման է ենթարկվել: Մանկապարտեզ և գերեզմանոց գնացող ճանապարհներն են վերանորոգվել, գերեզմանոցն էլ ցանցապատվել է: Երեք ամիսը մեկ գյուղի ընտանիքների յուրաքանչյուր անդամին 10 կգ ալյուր է բաշխվել, դա էլ է նպաստել, որ Հաղպատում այսօր մուրացկան մարդ չկա»,- ասաց Վահրամ Քառյանը:

Ըստ վերջինիս՝ գյուղի ընտանիքների 50 տոկոսը, այնուամենայնիվ, ձմռանը տունը փայտով է տաքացնում, սակայն եթե նախորդ տարիներին ամռան ուտեստների ու պահածոների համար հաղպատցիները ամիսը 20 հազար դրամի փայտ էին վառում, հիմա հարցը լուծվում է 1000 դրամ գազի վճարով:

Թեկնածուն հայտնեց, որ Հաղպատում սեպտեմբերի 9-ին աշխատելու է մեկ տեղամասային ընտրական հանձնաժողով: Վահրամ Քառյանը իր մրցակից թեկնածուներից գյուղապետ ընտրվելու ոչ մեկի հնարավորությունը չթերագնահատեց: Նա կարծում է, որ Հաղպատում ընտրակաշառքը իրեն չի արդարացնում, ոււղղակի գյուղում վախի մթնոլորտ կա, մարդիկ այդ զգացումը պետք է իրենց մեջից հանեն:

Թեկնածու Ռուբեն Վարոսյանի նախընտրական ծրագիրը լուսաբանելու համար «Հետքը» երկու օր հեռախոսով բանակցեց նրա հետ: «Ես Լենինգրադից հյուրեր ունեմ, չեմ կարող Ձեզ հանդիպել: Բացի այդ՝ ես ընենց տղա եմ ու ընենց գործեր ունեմ էդ գյուղի համար արած, որ կարամ ազատ իմ թեկնածությունը առաջադրեմ»,- ասաց Ռուբեն Վարոսյանը: Օգոստոսի 24-ին թեկնածուն, ի պատասխան մեր հեռախոսազանգի, ասաց. «Օրենքով սահմանված կարգով ես կարա՞մ Ձեզ ինտերվյու չտալ: Ուրեմն, եթե կարամ, օրենքով սահմանված կարգով չեմ ուզում ինտերվյու տալ»:

Հաղպատում կա 580 ընտրող: Ընտրություններին սովորաբար մասնակցում է առավելագույնը 420 ընտրող:

Առաջին լուսանկարը՝ Գայանե Առաքելյանի