ՀՀ տարածքային կառավարման և ենթակառուցվածքների նախարարությունը պարզաբանում է տարածել Ականատես» դիտորդական առաքելությունը հայտարարության մասին, որտեղ նշվում է․
««Ականատես» դիտորդական առաքելությունը հայտարարություն է տարածել` ըստ որի հոկտեմբերի 26-ին Առաջին ալիքի եթերում տեղի ունեցած բանավեճի ընթացքում «Քաղաքացիական պայմանագիր» կուսակցության թեկնածու և Վաղարշապատի համայնքի ղեկավարի ԺՊ Արգիշտի Մեխակյանը հայտարարել է, որ վերջին երկու ամսում համայնքը հրատապ ծրագրերով կառավարությունից կես մլրդ-ից ավելի գումար է ստացել։ Դիտորդական առաքելությունը պահանջել է ՀՀ կառավարությունից, ՀՀ տարածքային կառավարման և ենթակառուցվածքների նախարարությունից և Վաղարշապատի համայնքապետարանից ներկայացնել լրացուցիչ պարզաբանումներ՝ Վաղարշապատ համայնքին կատարված հատկացումների հիմնավորվածության վերաբերյալ։

Հարկ ենք համարում պարզաբանել, որ Վաղարշապատ համայնքում այս տարի իրականացվել է հրատապ 1 ծրագիր` կոյուղագծերի փոխարինում, որի համար հատկացվել է 185 մլն դրամ։ Նշված աշխատանքները հրատապ էին, քանի որ կոյուղու խողովակները հնամաշ էին և դրանց փոխարինումից հետո անհրաժեշտություն է առաջացել իրականացնել նաև քանդված փողոցի ասֆալտապատում, որն իրականացվում է պետական բյուջեի միջոցներով։

Առհասարակ ՀՀ տարածքային կառավարման և ենթակառուցվածքների նախարարությունը հրատապ ծրագրեր իրականացնում է հավասարապես բոլոր մարզերում` ըստ անհրաժեշտության։ Միայն վերջին ամիսներին ՀՀ կառավարության 2 որոշմամբ 10 մարզերին կապիտալ բնույթի 29 ծրագրեր իրականացնելու նպատակով հատկացվել է 2 մլրդ 207 մլն 835 հազ. դրամ։ Վերջին երկու ամսում Ապարան, Գյումրի, Գավառ համայնքներում տանիքների փոխարինման նպատակով հատկացվել է 265 մլն. դրամ, Տաշիր և Ալավերդի համայնքերում շինարարական աշխատանքներ իրականացնելու նպատակով հատկացվել է 693 մլն. դրամ, 500 մանկապարտեզ ծրագրում ընդգրկված Աբովյան համայնքի Պտղնի բնակավայրի մանկապարտեզի հիմնանորոգման աշխատանքների իրականացման նպատակով հատկացվել է 100 մլն. դրամ, Իջևան համայնքի Սարիգյուղ բնակավայրի խմելու ջրի համակարգի կառուցման, Կիրանց բնակավայրի խմելու ջրի և ոռոգման համակարգի կառուցման աշխատանքների իրականացման նպատակով հատկացվել է 323 մլն. դրամ։ Նման ծրագրերը շատ շատ են և ինչպես տեսանելի է վերը թվարկվածից՝ դրանք իրականացվում եմ ՀՀ գրեթե բոլոր մարզերում՝ ըստ հրատապության»։