Հակակոռուպցիոն կոմիտեում քննվող քրեական վարույթի շրջանակներում ձերբակալվել են Իջևանի նախկին քաղաքապետ Վարուժան Ներսիսյանն ու որդին՝ Նաիրի Ներսիսյանը։ Ի պատասխան մեր հարցման Հակակոռուպցիոն կոմիտեից հաստատեցին նախկին քաղաքապետի ու որդու ձերբակալման լուրը։

Հակակոռուպցիոն կոմիտեի մամուլի քարտուղար Մարինա Օհանջանյանը «Հետք»-ի հետ զրույցում ասաց, որ Իջևանի նախկին քաղաքապետը մեղադրվում է փողերի լվացման և պաշտոնեական լիազորությունները չարաշահելու մեջ։ Որդին ձերբակալվել է նույն քրեական վարույթի շրջանակում։

Հակակոռուպցիոն դատարանում այժմ քննվում է մեկ այլ գործ։ Հակակոռուպցիոն կոմիտեն հայտարարություն էր տարածել, որ 1999-2011 թվականներն ընկած ժամանակահատվածում Իջևան համայնքի ղեկավար Վարուժան Ներսիսյանը, Իջևան քաղաքի կենտրոնական հատվածում` Անկախության 13/41 հասցեում գտնվող հողամասն իրենը դարձնելու շահադիտական դրդումներից ելնելով, կազմակերպել է ձևական աճուրդ, որի հիման վրա հիշյալ հողամասը 2006թ․ փետրվարի 24-ին 1 մլն 991 հազ. 800 դրամով վաճառվել է իր նախկին ենթակային՝ առանց վերջինիս գիտության: Արդյունքում՝ համայնքի ղեկավարը փաստացի դարձել է նշված անձի անվամբ ձեռք բերված հողատարածքի սեփականատերը:

Ըստ Հակակոռուպցիոն կոմիտեի՝ դրանից հետո համայնքի ղեկավարը, օգտագործելով իր նախկին ենթակայի նկատմամբ ունեցած ծառայողական լիազորություններից բխող ազդեցությունը, հանցավոր ճանապարհով ստացված գույքի ձեռքբերումն օրինականացնելու և գույքի իրական պատկանելությունը թաքցնելու նպատակով, ցուցում է տվել վերջինիս անվամբ գրանցված սեփականության իրավունքը փոխանցել իր հետ փոխկապակցված անձին:

Քրեական վարույթով նախաքննությունն ավարտվել է, և վարույթի նյութերը մեղադրական եզրակացությամբ ուղարկվել է Հակակոռուպցիոն դատարան: