«Կապանի լեռնահարստացման կոմբինատ» ՓԲԸ-ի՝ Բնապահպանության եւ ընդերքի տեսչական մարմնի դեմ դատական գործը քննվելու է ոչ թե գրավոր ընթացակարգով, այլ ընդհանուր կանոններով: Դատական նիստն էլ նշանակվել է նոյեմբերի 6-ին։

Հիշեցնենք, որ Կապանի ԼՀԿ-ն անցյալ տարվա դեկտեմբերի 30-ին ԲԸՏՄ-ի դեմ հայց էր ներկայացրել Վարչական դատարան՝ պահանջելով անվավեր ճանաչել տեսչական մարմնի դեկտեմբերի 17-ի ստուգման ակտը:

Հայցն ընդունվել էր դատավոր Հերմինե Մուրադյանի վարույթ, որը որոշել էր գործը քննել գրավոր ընթացակարգով եւ ակտը հրապարակել հուլիսի 7-ին: Սակայն այդ օրը դատարանը որոշել է, թե քանի որ անհրաժեշտ է ձեռնարկել Վարչական դատավարության օրենսգրքով նախատեսված գործողություններ (փաստական հանգամանքներն ի պաշտոնե պարզելը), որոնք իր գնահատմամբ չեն կարող իրականացվել գրավոր ընթացակարգով, ապա անհրաժեշտ է գործը քննել ընդհանուր կանոններով եւ նախնական դատական նիստ հրավիրել նոյեմբերի 6-ին:

Սա Կապանի ԼՀԿ-ի երկրորդ դատական հայցն է ԲԸՏՄ-ի դեմ:  

Առաջին հայցը կոմբինատը ներկայացրել էր 2024 թ. դեկտեմբերի 13-ին:

Հիշեցնենք, որ «Հետքի» հրապարակման հիման վրա ԲԸՏՄ-ն կոմբինատում ստուգում էր սկսել նախորդ տարվա օգոստոսին։ Ստուգման նպատակն էր պարզել ԼՀԿ-ի կողմից Շահումյանի ոսկի-բազմամետաղային հանքավայրը բաց եղանակով շահագործելու թույլտվության առկայությունը եւ գործունեության համապատասխանությունը բնապահպանական եւ ընդերքօգտագործման ոլորտը կարգավորող օրենսդրության պահանջներին։

Քանի դեռ տեսչական մարմինը ստուգումը չէր ավարտել ու ստուգման ակտ չէր ընդունել, ԼՀԿ-ն դեկտեմբերի 13-ին դիմել էր Վարչական դատարան՝ խնդրելով ճանաչել ստուգում իրականացնելու իրավահարաբերության բացակայությունը։ Հայցն ընդունվել էր դատավոր Լիլիթ Սադոյանի վարույթ: Առաջիկա դատական նիստը նշանակվել է հոկտեմբերի 8-ին:

Ստուգման արդյունքում տեսչական մարմինը պարզել է, որ Կապանի ԼՀԿ–ի կողմից ապօրինի արդյունահանվել է 2895 տոննա հանքաքար, որը պարունակում է 13,5 կգ ոսկի, 251 կգ արծաթ, 23 տոննա պղինձ, 153 տոննա ցինկ եւ 18 տոննա կապար։ Դեկտեմբերի 26–ին ԲԸՏՄ-ն ստուգման նյութերն ուղարկել է Քննչական կոմիտե՝ հետագա ընթացքն ապահովելու համար։ Ահա ԲԸՏՄ-ի տեսչական այս ակտն է, որն անվավեր ճանաչելու համար դեկտեմբերի 30-ին ԼՀԿ-ն դիմել է Վարչական դատարան:

Հունվարի 15-ին ՔԿ-ում քրեական վարույթ է նախաձեռնվել ապօրինի ձեռնարկատիրական գործունեության հոդվածով: Քրեական վարույթի շրջանակներում ավելի ուշ նշանակվել է դատաէկոլոգիական փորձաքննություն:

Կապանի ԼՀԿ-ն պնդում է, որ ապօրինի հանքարդյունահանում չի իրականացրել: Հանքարդյունաբերողը նաեւ շեշտում է, որ տեսչական մարմնի կողմից ստուգումն իրականացվել է մի շարք ընթացակարգային խախտումներով, ինչպես նաեւ անհայտ մեթոդաբանությամբ, որոնք հանգեցրել են ոչ իրավաչափ եւ անհիմն ստուգման ակտի ընդունմանը, ինչի հետեւանքով ԼՀԿ-ին վերագրվել են իրավախախտումներ, որոնք ընկերության կողմից չեն կատարվել։

Տես նաեւ՝

• Կապանի ԼՀԿ-ին առնչվող քրեական վարույթի շրջանակներում դատաէկոլոգիական փորձաքննություն է նշանակվել
• Կապանի լեռնահարստացման կոմբինատում իրականացված ստուգման արդյունքներով քրեական վարույթ է նախաձեռնվել
• Կապանի լեռնահարստացման կոմբինատը դատի է տվել տեսչական մարմնին
• Տեսչական մարմին. Կապանի կոմբինատը ապօրինի 2900 տոննա հանքաքար է արդյունահանել, նյութերն ուղարկվել են Քննչական կոմիտե
• «Հետքի» հրապարակումից հետո տեսչական մարմինը ստուգում է սկսել Կապանի ԼՀԿ-ում
• Կապանի լեռնահարստացման կոմբինատն արձագանքել է «Հետքի» հոդվածին
• Տեսչական մարմինը Կապանի ԼՀԿ-ում ստուգում կիրականացնի. կառույցը չի հերքում, որ Սյունիքի տարածքային բաժնի պետն այնտեղ է աշխատել
• Ըստ բնակիչների՝ Կապանի ԼՀԿ-ն սկսել է Շահումյանի հանքի բաց եղանակով շահագործման աշխատանքներ. ընկերությունը հերքում է