Փոխվարչապետ Մհեր Գրիգորյանն ընդունել է Եվրոպական ներդրումային բանկի (ԵՆԲ) պատվիրակությանը՝ Արևելյան հարևանության երկրների պետական հատվածի վարկային գործառնությունների հարցով ղեկավար Մատեո Ռիվելինին գլխավորությամբ: Այս մասին հայտնում է Կառավարության մամուլի ծառայությունը։

Փոխվարչապետ Գրիգորյանը կատարած աշխատանքի և արդյունավետ համագործակցության համար շնորհակալություն է հայտնել հանդիպմանը մասնակցող ԵՆԲ Հարավային Կովկասի տարածաշրջանային ներկայացուցչության ղեկավար Մաչեյ Չուրային, ով ավարտում է իր առաքելությունը տվյալ պաշտոնում: Զրուցակիցները երկուստեք կարևորել են ԵՆԲ կողմից Հայաստանում իրականացվող ներդրումային ծրագրերը և անդրադարձել դրանց ընթացքին: Մհեր Գրիգորյանը նշել է, որ ԵՆԲ առանցքային գործընկեր է ենթակառուցվածքային խոշոր ծրագրերի, ինչպես նաև տնտեսության համար առանձնահատուկ կարևորություն ունեցող բնագավառներում իրականացվող բարեփոխումների տեսանկյունից:

Հանդիպմանը հետևել է ՀՀ կառավարություն-ԵՆԲ ծրագրերի տարեկան քննարկումը, որի մասնակցել են ԵՄ դեսպանը, ներգրավված գերատեսչությունների, պետական այլ մարմինների, հիմնադրամների ներկայացուցիչները։