Երեկ՝ 2025թ. հունիսի 17-ին, միջադեպ է տեղի ունեցել Սյունիքի մարզի Տաթև գյուղում, որի հետևանքով 34-ամյա աղջիկը, մարմնական վնասվածքներով, տեղափոխվել է հիվանդանոց: Ժամեր անց, բժշկական կենտրոն է տեղափոխվել նաև նրա եղբայրը: Նրանց հայրը պնդում է, որ դստերը վնասվածքներ է պատճառել  Տաթև գյուղի վարչական ղեկավար Գոռ Մինասյանը: Նախաձեռնվել է քրեական վարույթ: «Հետքի» տեղեկություններով՝ Գ. Մինասյանը ձերբակալվել է: Վերջինիս թիմակիցները պնդում են, որ կատարվածը քաղաքական դրդապատճառ ունի, և Գոռ Մինասյանն ամենևին կապ չունի կատարվածի հետ: 

Տուժածների հայրը՝ Վարուժան Մարտիրոսյանը, «Հետքի» հետ զրույցում ասաց, որ Տաթև գյուղի վարչական ղեկավար Գոռ Մինասյանը երեկ՝ 2025թ. հունիսի 17-ին, գյուղում 3 անգամ «Նիվա» մակնիշի ավտոմեքենայով հարվածել է դստեր՝  Մարո Մարտիրոսյանի մեքենային, այնուհետև 2 այլ տղամարդու հետ բացել են դստեր մեքենայի դուռն ու ծեծել Մարոյին, ինչի հետևանքով վնասվածքներ կան դեմքի տարբեր հատվածներում, կոտրվել է նաև քիթը։

Մարո Մարտիրոսյանին տեղափոխել են Գորիսի հիվանդանոց, որտեղից էլ Շտապօգնության ավտոմեքենայով տեղափոխվել է Երևանի «Էրեբունի» բժշկական կենտրոն։

Վարուժան Մարտիրոսյանը պատմեց, որ Երևանի հիվանդանոցում են եղել, երբ Էրեբունի վարչական շրջանից բժշկական կենտրոն տեղափոխել են նաև որդուն՝ Կարո Մարտիրոսյանին։ Դեմքն այնքան վնասված է եղել, որ սկզբում չի ճանաչել որդուն։

Վարուժան Մարտիրոսյանի պատմելով՝ Էրեբունի վարչական շրջանում մուրճով կոտրել են տղայի ոտքը և դաժան ծեծի ենթարկել։ Վ. Մարտիրոսյանը զավակներին ծեծելու դեպքերը միմյանց հետ է կապում։

Հարցին, թե ինչն է եղել դստեր ու որդու նկատմամբ դրսևորած նման վերաբերմունքի պատճառը, Վարուժան Մարտիրոսյանը դժվարացավ հստակ պատասխանել: Ասաց, որ 2018թ. մարտ ամսին իր սեփական կառուցապատված տարածքի մի մասը գաղտնի սեփականացրել են, ինչի մասին իմացել է մոտ մեկ տարի անց։ Դիմել է իրավապահ մարմիններին, դատարան, ինչից էլ վարչական ղեկավարի հետ լարվածությունը խորացել է։

Մասնավորապես՝ Վարուժան Մարտիրոսյանը 2022թ. մայիսին Գ. Մինասյանի դեմ հայց է ներկայացրել Սյունիքի մարզի առաջին ատյանի ընդհանուր իրավասության դատարան՝ Տաթևի վանքի հարակից տարածքի թիվ 4 օբյեկտ հասցեում գտնվող 0,4135 հա մակերեսով հողամասից 910 քմ մակերեսով ապօրինի տիրապետվող հողատարածքը վերադարձնելու պահանջով։ Գործի դատաքննությունը դեռ շարունակվում է։

Վարուժան Մարտիրոսյանն ասաց, որ ինքն իշխանական հայացքներ ունի, իսկ վեճի մյուս կողմում հայտնվածները՝ ընդդիմադիր, ինչն էլ սրում է իրավիճակը:

Քննչական կոմիտեից «Հետքին» հայտնեցին, որ հաղորդման առթիվ 2025թ. հունիսի 17-ին  Սյունիքի մարզային քննչական վարչությունում Քրեական օրենսգրքի 264-րդ հոդվածի 2-րդ մասի 5-րդ կետի (գույքը ոչնչացնել կամ վնասելը, որը կատարվել է խուլիգանական դրդումներով), 171-րդ հոդվածի 2-րդ մասի 5-րդ կետի (մի խումբ անձանց կողմից մեկ ուրիշի մարմնական վնասվածք կամ առողջությանն այլ վնաս պատճառելու) և 207-րդ հոդվածի 1-ին մասի (մարդու կամքին հակառակ կամ կամքն անտեսելով նրա բնակարան ապօրինի մուտք գործելը) հատկանիշներով նախաձեռնվել է քրեական վարույթ: 2 անձ տուժող է ճանաչվել: Նշանակվել են դատաբժշկական և դատաապրանքագիտական փորձաքննություններ:

Բացի այդ, մի խումբ անձանց կողմից ծեծի ենթարկվելու դեպքի առթիվ 2025թ.  հունիսի 17-ին Քննչական կոմիտեի Էրեբունի և Նուբարաշեն վարչական շրջանների քննչական բաժնում Քրեական օրենսգրքի 297-րդ հոդվածի 3-րդ մասով  (խուլիգանություն, որը կատարվել է զենքի կամ մարմնական վնասվածք պատճառելու համար նախապես պատրաստված կամ հարմարեցված առարկայի կամ միջոցի գործադրմամբ) և  167-րդ հոդվածի 2-րդ մասի 7-րդ և 8-րդ կետերով (մի խումբ անձանց կողմից զենքի կամ մարմնական վնասվածք պատճառելու համար նախապես պատրաստված կամ հարմարեցված առարկայի միջոցով մեկ ուրիշին մարմնական վնասվածք կամ առողջությանը որևէ այլ վնաս պատճառելը, որը վտանգավոր չէ կյանքի համար) նախաձեռնվել է քրեական վարույթ:

Թե՛ Սյունիքում, թե՛ Երևանում նախաձեռնված քրեական վարույթներով մեկական անձ է ձերբակալվել։ «Հետքի» տեղեկություններով՝ նրանցից մեկը Տաթև գյուղի վարչական ղեկավար Գոռ Մինասյանն է, ինչի պատճառով նրանից չկարողացանք պարզաբանումներ ստանալ։

Տաթև խոշորացված համայնքի աշխատակազմի քարտուղար Մարի Թևոսյանը «Հետքի» հետ զրույցում նշեց, որ դեպքն ուռճացված է հանրությանը ներկայացվել, կատարվածի հետ Գոռ Մինասյանը որևէ կապ չունի: Նրա անունը շահարկվում է քաղաքական և անձնական այլ նպատակներով:

Մարի Թևոսյանի խոսքերով՝ այս վիճակին հասել են իրավապահ մարմինների բացթողումների պատճառով:

Տաթև համայնքի աշխատակազմի քարտուղարը նշեց, որ 2021թ. Վարուժան Մարտիրոսյանը եղել է Տաթև համայնքի ղեկավարի տեղակալ: Սակայն, պաշտոնավարել է 6 ամիս: Նույն տարվա հոկտեմբերին Տաթև համայնքի ավագանու ընտրությունների արդյունքում Վ. Մարտիրոսյանը լքել է այդ պաշտոնը, ինչից հետո էլ ավելի են սրվել Գոռ Մինասյանի ու Վարուժան Մարտիրոսյանի հարաբերությունները՝ վերջինիս կողմից հրահրվել են վեճեր, կոնֆլիկտներ:

Մարի Թևոսյանը պատմեց, որ 2023թ. հոկտեմբերի 10-ի կեսգիշերին հայհոյանքներով նամակ է ստացել: Եղել է նաև անձնական բնույթի խոսակցություններով մոնտաժված ձայնային հաղորդագրություն՝ իր և Գ. Մինասյանի մասնակցությամբ:

Մ. Թևոսյանի փոխանցմամբ՝ նույն նամակները փոխանցվել են և՛ իր հարազատներին, և՛ Գոռի ընկերներին ու հարազատներին: Դրանից հետո Մ. Թևոսյանը եկել է Երևան և հանցագործության մասին հաղորդում ներկայացրել, քանի որ թերհավատորեն է  մոտեցել տարածքային իրավապահ մարմինների գործողություններին: Նախաձեռնվել է քրեական վարույթ, գործն ուղարկվել է Սյունիքի մարզ, որը մինչ օրս քննվում է: Այդ ընթացքում, ըստ Մ. Թևոսյանի, այդ նամակները դարձյալ տարածվել են: Տաթևի աշխատակազմի քարտուղարի փոխանցմամբ՝ հաղորդում տալու ժամանակ իրավապահներին, որպես կասկածյալ, հայտնել է նաև Մարտիրոսյանների անունը:

2 օր առաջ Մարի Թևոսյանին Տաթև գյուղից մի կին պատմել է, որ այդ ամենը կազմակերպվել է Վարուժան Մարտիրոսյանի զավակների կողմից:

Այդ լուրը իմանալուց հետո, Մ. Թևոսյանը  տեղեկատվությունը փոխանցած անձի հետ շտապել է Գորիս՝ քննիչին իմացածը հայտնելու: Թևոսյանի փոխանցմամբ՝ ճանապարհին տեսել է, որ Վարուժան Մարտիրոսյանի դուստրն իրենց ավտոմեքենայի հետևից է գալիս: Մտածելով, որ վերջինս ցանկանում է արգելք հանդիսանալ քննիչի մոտ գնալու համար, Մարի Թևոսյանը, ճանապարհին տեսնելով Գոռ Մինասյանի ընկերոջը, հայտնել է, որ Վ. Մարտիրոսյանի դուստրն իրենց հետևում է: 

«Գոռ Մինասյանի ընկերը կասեցրել է Մարո Մարտիրոսյանի ընթացքը՝ ավտոմեքենայով հարվածել են իրար, հետո  վիճաբանություն է առաջացել, իրար քաշքշել են: Այդ տարածքում Գոռը չի եղել, և անհասկանալի է, թե ինչու են Գոռի անունը տալիս»,- ասում է Տաթև համայնքի աշխատակազմի քարտուղարը:

Ինչ վերաբերում է Կարո Մարտիրոսյանին ծեծելուն, ապա Մարի Թևոսյանը չցանկացավ մեկնաբանել, քանի որ դեպքը տեղի է ունեցել Երևանում, իսկ Գոռը  գյուղում է եղել: Նշեց նաև, որ Մարո Մարտիրոսյանին ցուցված չի եղել Երևանի բժշկական կենտրոն տեղափոխելը, այդպես են արել, որ հնչեղություն հաղորդեն կատարվածին:

Մարի Թևոսյանն ասաց, որ այսօր հարցաքննվել է և այս ամենը պատմել է նաև քննիչին: 

Լուսանկարում` Մարո Մարտիրոսյանը