Ոստիկանության պետական պահպանության գլխավոր վարչության նախկին պետ Արամ Զաքարյանը 2025թ․ հունիսի 20-ին հրավիրվել է Գլխավոր դատախազության ապօրինի ծագում ունեցող գույքի բռնագանձման գործերով վարչություն։ Նախկին պաշտոնյային պատկանող գույքի առնչությամբ իրականացվել է ուսումնասիրություն, որի արդյունքում կազմվել է ամփոփագիր:

Արամ Զաքարյանն այդ պաշտոնում նշանակվել է 2016թ․ հոկտեմբերի 12-ին և պաշտոնից ազատվել 2018թ․ հուլիսի 12-ին։

Թե Գլխավոր դատախազությունն Արամ Զաքարյանին պատկանող որ գույքերը կամ ինչ չափի դրամական միջոցներ է դիտարկում ապօրինի, առայժմ հայտնի չէ։ Այս փուլում Դատախազությունը տեղեկությունը չի հանրայնացնում՝ պատճառաբանելով, որ շահագրգիռ կողմը, ծանոթանալով իրականացված ուսումնասիրության նյութերին, կարող  է ներկայացնել ապացույցներ, դիրքորոշում, ինչը հնարավոր է փոփոխություն առաջացնի ենթադրյալ բռնագանձման ենթակա գույքի ցանկում։

Նշենք, որ Հակակոռուպցիոն քրեական դատարանում քննվում է նաև Արամ Զաքարյանին առնչվող քրեական գործ։ Նախկին պաշտոնյան մեղադրվում է այն բանի համար, որ Ոստիկանության պետական պահպանության գլխավոր վարչության պետի պաշտոնում նշանակվելուց հետո, նույն վարչության Արմավիրի պահպանության բաժանմունքի պետին հրահանգել է հիշյալ պայմանագրերի հիման վրա տնտեսվարող սուբյեկտների կողմից տրամադրվելիք վարձավճարներից հափշտակել գումարներ՝ իրեն տալով հափշտակված գումարներից ամսական մասնաբաժին՝ երաշխավորելով, որ հափշտակությունը չի բացահայտվի:

Ըստ մեղադրանքի՝ Արմավիրի պահպանության բաժանմունքի հաշվեհամարին փաստացի փոխանցման ենթակա, սակայն առանձին տնտեսվարող սուբյեկտներից նույն բաժանմունքի ջոկի հրամանատարի միջոցով առձեռն ստացված առանձնապես խոշոր չափերով՝ ընդհանուր մոտ 17 մլն 639 հազ․ դրամ գումարից Արամ Զաքարյանի կողմից փաստացի յուրացվել է 18.000 ԱՄՆ դոլարին համարժեք` 8 մլն 679 հազ․ դրամ։

Հիշեցնենք, որ նույն քրեական գործով անցնում է նաև Ոստիկանության պետական պահպանության գլխավոր վարչության նախկին պետ Ռոմա Մկրտումյանը։ Վերջինս պաշտոնավարել է Արամ Զաքարյանից առաջ։

Առաջադրված մեղադրանքի համաձայն՝ ընդհանուր մոտ 9 մլն 452 հազ․ դրամ յուրացված գումարից Ռոմա Մկրտումյանին «բաժին» է հասել 11.900 ԱՄՆ դոլարին համարժեք մոտ 4 մլն 918 հազ․ դրամ:

Ռոմա Մկրտումյանի գույքի առնչությամբ ևս Դատախազությունն ուսումնասիրություն է իրականացրել։