2025 թվականի ապրիլի 1-ի դրությամբ Հայաստանի մշտական բնակչության թիվը 3 081 100 է: Հունվարի սկզբի համեմատ մշտական բնակչության թիվն աճել է 4900-ով կամ 0.2%-ով։

Ինչպես ցույց են տալիս Վիճակագրական կոմիտեի (ՀՀ ՎԿ) տվյալները, Հայաստանի բնակչության 37%-ը՝ 1 142 400, հաշվառված է Երևանում։

Մշտական բնակչության թվաքանակում հաշվառվում են այն անձինք, ովքեր մշտապես բնակվում են տվյալ տարածքում, ներառյալ մարդահամարի պահին ժամանակավոր՝ մինչև մեկ տարի, բացակայողները:

Մշտական բնակչության թվով երկրորդ տեղում Կոտայքի մարզն է, որտեղ հաշվառված է 294 400 բնակիչ։ 

Երրորդ տեղում Արմավիրն է՝ 268 900 բնակչով։ 

Հայաստանի մարզերից ամենափոքր թվով բնակչությունն ունի Վայոց Ձորը՝ 49 500:

Երևանում բնակչության թվով առաջինը Մալաթիա-Սեբաստիան է

Երևանի վարչական շրջաններից ամենաշատ մշտական բնակչություն ունեցողը Մալաթիա-Սեբաստիան է։ Այս տարվա ապրիլի 1-ի դրությամբ Մալաթիա-Սեբաստիայում ապրում է 150 100 մարդ, որը Երևանի բնակչության շուրջ 13%-ն է։

Մշտական բնակչության թվով առաջին եռյակում են նաև Շենգավիթն ու Նոր Նորքը՝ յուրաքանչյուրը 12% տեսակարար կշռով։

Առավել քիչ բնակեցված է Նուբարաշենը՝ 11 100 մարդ, որը Երևանի բնակչության 1%-ն է։ 

Մյուս վարչական շրջանների տեսակարար կշիռները ներկայացված են ինֆոգրաֆիկայում։

Բնակչության թվաքանակի վերաբերյալ տեղեկության ստացման սկզբնաղբյուրը բնակչության մարդահամարներն են:

Ընթացիկ հաշվառումն իրականացվում է բնակչության վերջին մարդահամարի արդյունքների հիման վրա (2022թ.) ստացված մշտական բնակչության տվյալներով, որոնց ամեն տարի ավելացվում են տվյալ տարածքի ծնվածների և եկողների (հաշվառվածների) թվաքանակը, հանվում են մահացածների և տվյալ տարածքից մեկնածների (հաշվառումից հանվածների) թվաքանակը: