UWC Դիլիջանի 2018թ. շրջանավարտ, այժմ արդեն UWC Դիլիջանում որպես մաթեմատիկայի ուսուցչի օգնական աշխատող Նուր Մուսսան բանախոսությամբ դիմել է Երևանում կայացած Միջխորհրդարանական միության երիտասարդ խորհրդարանականների 10-րդ գլոբալ համաժողովի մասնակիցներին:

Համաժողովը, որն այս տարի հյուրընկալվեց Երևանում, սեպտեմբերի 12-14-ը, Դվին համալիրի Սեվեն վիժնզ դահլիճում, ընթանում է «Խուսափելով կորսված սերունդներ ունենալուց. պահպանելով կրթությունն ու զբաղվածությունը բոլոր հանգամանքներում» խորագրի ներքո:

Նուրի անցած ուղին դեպի UWC Դիլիջան և Հայաստան, որտեղ նա այժմ աշխատում և բնակվում է, ուղղակիորեն առնչվում է համաժողովի խորագրին: Նրա կյանքի պատմությունը հզոր և ոգևորիչ ուղերձ է մասնակից երիտասարդ խորհրդարանականներին՝ կոչ անելով նրանց գործել, որպեսզի ոչ ոք լուսանցքում չմնա:

Իր բանախոսության ընթացքում Նուրն ընդգծեց, թե ինչպիսի վերափոխիչ հնարավորություն է ընձեռվել իրեն UWC Դիլիջանի դպրոցի, Հայաստանի Հանրապետության և UWC Դիլիջանի դպրոցի համահիմնադիրներ Ռուբեն Վարդանյանի և Վերոնիկա Զոնաբենդի շնորհիվ: Նա համոզված է, որ կրթությունն ուժ է՝ մեջբերելով Ռուբեն Վարդանյանի խոսքերը, ով 2023 թ. սեպտեմբերի 27-ից ի վեր ապօրինաբար բանտարկված է Բաքվում. «Պատրաստ լինենք տալ ավելին, քան երբևէ հույս ունենք հետ ստանալ»:

Նուրի ուղին դեպի Հայաստան սկիզբ առավ 2016թ., երբ նա ընդունվեց UWC Դիլիջանի դպրոց: Նա սուդանցի փախստականների ընտանիքից էր, ովքեր ապաստան էին գտել Լիբանանում: Նուրին չէր հաջողվել Լիբանանի քաղաքացիություն ստանալ: Նրա ունեցած միակ փաստաթղթերն էին ծննդյան վկայականը և հոր փախստականի վկայականը: ՄԱԿ-ի փախստականների հանձնակատարի գրասենյակի օգնությամբ Նուռը ստացավ լեսե-պասե փաստաթուղթ և կարողացավ ժամանել Հայաստան, որը նրա համար խաղաղ հանգրվան դարձավ:

UWC Դիլիջան ընդունվելուն պես երևաց Նուրի՝ ուսման հանդեպ սերը և հակումը դեպի ճշգրիտ գիտություններ: Նրա կրթությունը UWC Դիլիջանում հովանավորել է Ավրորա մարդասիրական նախաձեռնությունը, որը 2016-2018 թթ. կրթաթոշակներ է շնորհել հակամարտության գոտիներից ընդունված ուսանողներին:

UWC Դիլիջան ընդունվելը շրջադարձային էր Նուրի կյանքում: «Այստեղ սովորեցի, թե որքան կարևոր է ճանաչել մյուսներին, որպեսզի ճանաչես ինքդ քեզ: Ամերիկայի Միացյալ Նահանգներում Ռոչեսթերի համալսարանն ավարտելուց հետո Նուրը վերադարձել է UWC Դիլիջան, որտեղ աշխատում է որպես նաթեմատիկայի ուսուցչի օգնական: